عێراق بۆ گەڕاندنەوەی کۆچبەران لە لیبیا فڕۆکەیەک دەنێرێتە ئەو وڵاتە

ئاڤا نیوز

محەممەد شیاع سوودانی، سەرۆکوەزیرانی عێراق، بڕیاری دا فڕۆکەیەکی تایبەت ڕەوانەی وڵاتی لیبیا بکرێت، بە مەبەستی ڕزگارکردن و گەڕاندنەوەی دەیان کۆچبەری کورد کە لەو وڵاتەدا گیریان خواردووە و کەوتوونەتە دەستی گرووپە چەکدارەکان.

وێنە گەورەکە: لە ساڵی ڕابردووەوە لیبیا بووەتە یەکێک لە سەرەکیترین و مەترسیدارترین ڕێڕەوەکانی کۆچی نایاسایی بەرەو وڵاتانی ئەوروپا، بەتایبەت بۆ گەیشتن بە کەناراوەکانی ئیتاڵیا. زۆربەی ئەو گەنجانەی هەرێمی کوردستان کە ئەم ڕێگایە دەگرنە بەر، لەلایەن مافیاکانی بازرگانیکردن بە مرۆڤەوە دەستگیر دەکرێن و ڕووبەڕووی ئەشکەنجە، ڕفاندن و مەترسیی گیانلەدەستدان دەبنەوە.

چیرۆکی سەرەکی: پڕۆسەی گەڕاندنەوەی کۆچبەرەکان دوای پێشکەشکردنی یاداشتێکی فەرمی دێت لەلایەن د. موسەننا ئەمین، پەرلەمانتاری عێراق بۆ سەرۆکوەزیران، کە تێیدا داوای "دەستێوەردانی خێرا"ی کردووە بۆ پاراستنی گیانی ئەو هاووڵاتییانەی لەو وڵاتەدا بێسەروشوێن بوون یان گیریان خواردووە.

لێدوانی فەرمی: د. موسەننا ئەمین، ئەندامی پەرلەمانی عێراق بە ئاڤا ڕاگەیاند: "نزیکەی 100 پەنابەر لە لیبیا کەوتوونەتە دەستی گرووپە چەکدارەکان و مافیاکان، یان گیریان خواردووە و ناتوانن بگەڕێنەوە؛ بۆیە یاداشتێکی فەرمیم داوەتە محەممەد شیاع سوودانی و ئەویش ڕەزامەندیی لەسەر ناردنی فڕۆکەیەکی تایبەت بۆ گەڕاندنەوەیان دەربڕیوە."

زانیاریی زیاتر: چاوەڕوان دەکرێت لە داهاتوودا فڕۆکەکە بگاتە لیبیا و گەڕاندنەوەی کۆچبەرەکان دەست پێ بکات. ئەم هەنگاوە دوای ئەوە دێت کە چەندین گرتەی ڤیدیۆیی لە تۆڕە کۆمەڵایەتییەکان بڵاو بوونەوە، کە تێیدا کۆچبەرانی کورد لەناو گرتووخانە نافەرمییەکانی لیبیادا داوای هاوکارییان دەکرد.