هەرێمی کوردستان لە ماوەی سێ مانگی ڕابردوو نزیکەی 20 ملیۆن بەرمیل نەوتی ڕادەستی کۆمپانیای سۆمۆ کردووە

ئاڤا نیوز

 

دوای ڕێککەوتنی نێوان حکومەتی هەرێمی کوردستان، حکومەتی فیدڕاڵ و کۆمپانیاکانی بواری نەوت، هەناردەی نەوتی هەرێمی کوردستان لە ڕێگای کۆمپانیای سۆمۆوە دەستیپێکردەوە، لەماوەی سێ مانگی کۆتایی ئەمساڵ حکومەتی هەرێمی کوردستان نزیکەی 20 ملیۆن بەرمیل ڕادەستی کۆمپانیای سۆمۆ کراوە. 

 

لێدوانی فەرمی: ئامانج ڕەحیم، سکرتێری ئەنجوومەنی وەزیرانی هەرێمی کوردستان، بە ئاڤا میدیای ڕاگەیاند، هەرێمی کوردستان لە بەرواری 27-9-2025 تاوەکو 31-12-2025 بڕی 19 ملیۆن و 594 هەزار و 871 بەرمیل نەوتی ڕادەستی کۆمپانیای سۆمۆ کردووە، بە تێکڕای 218 هەزار بەرمیل نەوت لە ڕۆژێکدا.

 

لەلایەکی دیکە: ڕێککەوتنی هەناردەکردنی نەوت بۆ سێ مانگە، پێشتر د. حەمدی شنگالی، جێگری بەڕێوەبەری کۆمپانیای سۆمۆ، بە ئاڤای ڕاگەیاندبوو، ڕێککەوتنەکە بۆ سێ مانگە و لەسەر ماوەی بودجە دانراوە، لە 31-12-2025، تەواو دەبێت، دواتر بە ڕێککەوتنی هەرسێ لایەنەکە درێژەی پێ دەدرێت. 

 

زانیاریی زیاتر: تێکڕای نرخی یەک بەرمیل نەوتی برێنت، لە سێ مانگی کۆتایی ساڵی 2025 بریتی بووە لە 62 دۆلار، لەسەر ئەم بنەمایە، کۆی گشتیی داهاتی ئەو نەوتەی لە سێ مانگی کۆتایی دراوە بە کۆمپانیای سۆمۆ دەکاتە بڕی یەک ملیار و 215 ملیۆن دۆلار، ئەمەش بە داهات بۆ گەنجینەی فیدڕاڵیی وەزارەتی دارایی عێراق تۆمارکراوە.