عەلی حەمەساڵح: سلێمانی کراوەتە شوێنی ساغکردنەوەی گۆشتی بەستووی قاچاخ

ئاڤا نیوز

سەرۆکی ڕەوتی هەڵوێست ڕایگەیاندووە، هەموو شەوێک 10 بارهەڵگر گۆشتی بەستوو بەشێوەی ناسایی و بەبێ پشکنین دەهێنرێتە سلێمانی.

 

وێنە گەورەکە: لەماوەی چەند ساڵی ڕابردوودا، چەندین دۆسیەی هێنانی خواردن و کەرەستەی قاچاخ لە پارێزگای سلێمانی ئاشکرا بووە و دوای لێکۆڵینەوە دەرکەوتووە بەرپرسانی یەکێتی لەپشت ئەو مامەڵە نایاساییانەن.

 

ڕاگەیێنراوی فەرمی: عەلی حەمە ساڵح، سەرۆکی ڕەوتی هەڵوێست لە هەژماری فەرمی خۆی لە تۆڕی کۆمەڵایەتی فەیسبووک نووسیویەتی، " چ تاوانێک لەمە گەورەترە، ئەمشەو لە وردەکاری دڵنیابووم، هەموو شەوێک 10 بارهەڵگر گۆشتی بەستوو، بەنایاسایی داخڵی سلێمانی دەکرێت، بەبێ فەحس تەنی بە 700 دۆلار".

 

زانیاریی زیاتر: عەلی حەمە ساڵح ئەوەشی نووسیوە، "هەموو شەوێک 175 هەزار دۆلار! تەنیا لە گۆشتی بەستوو! لە بازگەکان دەوترێت تەنسیقە! واتە: حیزب ڕێگای پێدەدات و پارەکەی بۆ حیزبە، ئەی هاوار لەم تاوان و ڕاوڕووتە!".

 

ئەوەی پێویستە بیزانیت: ئاڤا میدیا لەچوارچێوەی بەرنامە بنکۆڵکاریی (زەڕەبین)، لەماوەی ڕابردوودا چەندین دۆسیەی قاچاخی وەک کارگەی دروستکردنی ماددەی هۆشبەر و گەندەڵی لە پڕۆژەی نیشتەجێبوون لە پارێزگای سلێمانی ئاشکرا کردووە.