پشووی سەری ساڵ جووڵەی بازرگانیی لە باشماخ ڕاناگرێت

ئاڤا نیوز 

 

پشووەکانی سەری ساڵ کاریگەری لەسەر جووڵە بازرگانییەکان لە دەروازەی نێودەوڵەتیی باشماخ نابێت و بەردەوام دەبن، بەڕێوەبەری دەروازەکە دەڵێت 'ڕۆژانی سەری ساڵیش پێشوازی لە هەموو جووڵەیەکی بازرگانی دەکەین'.

 

وێنە گەورەکە: حکومەتی هەرێمی کوردستان 25ی کانوونی یەکەمی ئەمساڵی تاوەکو 5ی کانوونی دووەمی ساڵی نوێ بە پشووی فەرمی ڕاگەیاند، ئەمەش جۆرێک لە نادڵنیایی لای بازرگان و کۆمپانیا بازرگانییەکان دروستکرد، کە کاڵا و کەلوپەلەکانیان لە دەرەوە بەتایبەت ئێران هاوردە دەکەن.

 

لێدوانی فەرمی: شاخەوان بەکر، بەڕێوەبەری گومرگی دەروازەی نێودەوڵەتیی باشماخ بە ئاڤا میدیای ڕاگەیاند: پشووەکانی سەری ساڵ کاریگەری لەسەر جووڵەی بازرگانی لای ئێمە نابێت.

 

زانیاریی بەدەستهاتوو: هێشتا لە دەروازەی نێودەوڵەتیی باشماخ حساباتی کۆتایی ساڵ نەکراوە. بەگوێرەی پێناسەی گومرگی عێراقی کار لە خاڵە سنوورییەکان دەکرێت، بەو پێیەش ساڵی 2023 قەبارەی بازرگانی لە باشماخ نزیکەی حەوت ملیار دۆلار بووە. بەڵام بەڕێوەبەری دەروازەکە دەڵێت "ئەو بەهایەی بۆ قەبارەی بازرگانی دانراوە ڕاستەقینە نییە، چونکە هەندێکجار بەهاکە کەمتر لە بەهای ڕاستی دەردەچێت".