پەرلەمانتارێکی پێشوو لەسەر حەشدی شەعبی هەڕەشەی "دەستبڕین"دەکات

ئاڤا نیوز

 

پەرلەمانتارێکی پێشووی دەوڵەتی یاسا هەڕەشی "دەست بڕین" لەوانە دەکات لەناو پەرلەمان دەست بۆ هەڵوەشانەوەی حەشدی شەعبی بەرز بکەنەوە و هەڵوەشانەوەی حەشدی شەعبی بە هەڵوەشانەوەو کۆتاییهاتنی شیعە ناو دەبات.

 

وێنە گەورەکە: لە چەندین بۆنەدا بەرپرسانی عێراقی ئەوەیان نەشاردووەتەوە کە هەڕەشە لەسەر عێراق هەیە بەبۆنەی چالاکیی گرووپە چەکدارەکان و پشتیوانیکردنیان لە حەماس و حیزبوڵڵا و بە ئامانجگرتنی بە بەرژەوەندییەکانی ئەمریکا و ئیسرائیل لە ناوچەکە. لەسەر ئەو بنەمایەش چەند داوایەک بۆ هەڵوەشانەوە و کۆتاییهێنان بەو هێزانە خراوەتە بەردەم دەسەڵاتدارانی عێراق.

 

لێدوانی ڕۆژنامەوانی: کازم سەیادی، پەرلەمانتاری پێشووی عێراق لە هاوپەیمانی دەوڵەتی یاسا لە میانی دیدارێکی تەلەڤزیۆنیدا لەبارەی پرسی هەڵوەشانەوەی حەشدی شەعبی ئەو داوایانە لەوبارەیەوە هەن، ڕایگەیاند: "مەحاڵە حەشدی شەعبی هەڵوەشێتەوە، لە پەرلەمان دەنگی لەسەر دراوە، هەر کەسێکیش لە پەرلەمانەوە دەست بۆ هەڵوەشانەوەی حەشدی شەعبی بەرز بکاتەوە، "ئێمە دەستی دەبڕین".

 

قووڵتر: بە گوتەی سەیادی، "هەڵوەشانەوەی حەشدی شەعبی واتە هەڵوەشانەوەی شیعە، مانەوەی حەشدیش واتە مانەوەی شیعە".