بەغدا و واشنتن جەخت لەسەر گرنگی ڕۆڵی کاریگەریی عێراق لە ناوچەکە دەکەنەوە

ئاڤا نیوز

 

بەغدا و واشنتن جەخت لەسەر گرنگی ڕۆڵی سەرەکی و کاریگەریی عێراق لە ناوچەکە و گرنگییەکەی لە بەرزکردنەوەی ئاسایش و سەقامگیری لەسەر ئاستی نێودەوڵەتی و ناوچەیی دەکەنەوە.

 

وێنە گەورەکە: لە چوارچێوەی تووندکردنەوەی فشارە نێودەوڵەتییەکان و دەستپێکردنی هێرشەکانی ئەمریکا بۆ سەر حووسییەکانی یەمەن، ئەمریکا هۆشداریی بە عێراق دابوو لە کۆنترۆڵکردنی گرووپە چەکدارەکان، ئەمەش لەمیانی پەیوەندییە تەلەفۆنییەکەی نێوان وەزیری بەرگریی ئەمریکا و سەرۆکوەزیرانی عێراق.

 

چیرۆکی سەرەکی: ڕۆژی یەکشەممە، قاسم ئەعەرەجی، ڕاوێژکاری ئاسایشیی نیشتمانیی عێراق پێشوازی لە دانیال ڕوبینشتاین، ڕاوێژکاری کاروباری باڵیۆزخانەی ئەمریکا لە بەغدا کرد.

 

ڕاگەیێنراوی فەرمی: بەگوێرەی ڕاگەیێنراوی نووسینگەی ڕاگەیاندنی ڕاوێژکاری ئاسایشیی نیشتمانیی عێراق لە کۆبوونەوەکەدا پێداچوونەوە بە دوایین پێشهاتەکانی ناوچەکە کرا، هاوکات تاوتوێی بەردەوامی هاوکاری نێوان عێراق و ئەمریکا لە بواری بەرەنگاربوونەوەی تیرۆر و بوارەکانی دیکە کە خزمەت بە بەرژەوەندییەکانی هەردوو وڵات دەکەن، کرا.

 

- لە دیدارەکەدا جەخت لە گرنگی ڕۆڵی سەرەکی و کاریگەریی عێراق لە ناوچەکە و گرنگییەکەی لە بەرزکردنەوەی ئاسایش و سەقامگیری لەسەر ئاستی نێودەوڵەتی و ناوچەیی کرایەوە.