عەبادی: وابەستەیی سیاسیی دەرەکی ڕەتدەکەینەوە

ئاڤا نیوز

سەرۆکوەزیرانی پێشووتری عێراق دەڵێت، ئاساییە لایەنەکانی عێراق وابەستەیی ئاینیی دەرەکی بن وەک پابەندبوون بە ویلایەتی فیقهی، بەڵام پێویستە لەسەر خاکی وڵاتەکە وابەستەیی سیاسیی دەرەکی بوونی نەبێت.

وێنە گەورەکە: بەشێک لەلایەنەکانی عێراق یەکتریی بە وابەستەیی سیاسەتی وڵاتانی هەرێمیی بەگشتی و بەتایبەت ئێران تۆمەتبار دەکەن، بەشێک لەلایەنەکانی شیعەش پابەندبوونی تەواوی خۆیان بە سیاسەتی ویلایەتی فیقهی ناشارنەوە و بە شانازییەوە پابەندن پێوەی.

لێدوانی فەرمی: حەیدەر عەبادی، سەرۆکوەزیرانی پێشووتری عێراق لە چاوپێککەوتنێکدا ئاماژەی بەوەکرد، مەترسی لەسەر کەرتی دارایی و ئابووری عێراق هەیە، ئەویش بەهۆی زیادکردنی دامەزراندن و خەرجییەکانی دەوڵەت بەشێوەی هەڕەمەکیی و جێگیریی و مەترسیی کەمبوونەوەی داهاتەکانی دەوڵەت.

ـ وابەستەیی ئاینیی لە هەموو وڵاتێکی جیهاندا هەیە و شتێکی ئاساییە، "وەک ئەوەی ئێمە هەر کامێکمان مسوڵمانین و پەیڕەوی لە ڕێبازێکی میانڕەوی دیارییکراو دەکەین"، بەڵام نابێت سیستمی وابەستەیی سیاسیی لەسەر خاکی عێراق بوونی هەبێت.

- نابێت پاساو بۆ مانەوەی چەک لە دەرەوەی دەوڵەت بهێنرێتەوە.

- دیاردەی چەکداریی دۆخی ئارامی کۆمەڵایەتیی و شەقام دەشێوێنێت.

- هیچ بڕیار و هەوڵێکی ڕاستەقینە بۆ تێکەڵکردنی حەشدی شەعبی بە دامەزراوەکانی دیکەوە نییە و حەشد وەک دامەزراوەیەکی سەربەخۆ دەمێنێتەوە.