ئەم هەفتەیە کۆبوونەوەی ئەردۆغان و دەم پارتی دەکرێت

ئاڤا نیوز

 

عومەر چێلیک، گوتەبێژی ئاکپارتی ڕایگەیاند، لەم هەفتەیەدا ڕەجەب تەیب ئەردۆغان، سەرۆککۆماری تورکیا لەگەڵ شاندی دەم پارتی کۆدەبێتەوە. 

 

بۆچی گرنگە: یەکەمجارە لە چوارچێوەی پڕۆسەی ئاشتی، شاندی دەم پارتی لەگەڵ ئەردۆغان کۆببنەوە. 

 

زانیاریی تایبەت: ئاڤا لە سەرچاوەیەکی نزیک لە ئاکپارتی زانیویەتی، لەم ماوەیەدا ژێربەژێر کار لەسەر ڕێکخستنی ئەم کۆبوونەوەیە کراوە، شاندەکە دوای ئەم کۆبوونەوەیە، سەردانی سەڵاحەددین دەمیرتاش لە زیندان دەکەن، دواتریش دەچنە قەندیل و کار لەسەر ڕێکخستنی کۆنگرەی پەکەکە دەکرێت. 

 

زانیاریی ئاڤا: ئاڤا زانیویەتی، تورکیا خواستی لەسەر ئەوە هەیە کە کۆنگرەی پەکەکە لە هەولێر بکرێت. 

 

لێدوانی فەرمی: چێلیک، لە کۆنگرەیەکی ڕۆژنامەوانیدا ڕایگەیاند، دەم پارتی داوای چاوپێکەوتنی لە سەرۆککۆمار کردووە و داواکاریی چاوپێکەوتنی شاندی دەم پارتی لەگەڵ سەرۆککۆمار بە ئەرێنی وەڵام دراوەتەوە. هاوکات لەم هەفتەیەدا سەرۆککۆمار ڕۆژێک بۆ کۆبوونەوە لەگەڵ دەم پارتی دیاری دەکات.

 

بۆچوونی لایەنی بەرامبەر: تونجەر بەکرهان، هاوسەرۆکی دەم پارتی ڕایگەیاند: تاوەکو ئێستا بەرواری سەردانەکە دیاری نەکراوە، بەڵام پێیان گوتین لەم هەفتەیە دەبێت، ئێمەش هیودارین و چاوەڕێین لەم هەفتەیەدا بێت.

 

قووڵتر: ماوەیەکە بەهۆی گرژییەکانی نێوان دەسەڵات و ئۆپۆزسیۆن، کۆبوونەوە و چاوپێکەوتنەکان لەسەر پرۆسەی ئاشتی ڕاگیراوە، بەڵام بەگوێرەی زانیارییەکانی ئاڤا کە لە سەرچاوەیەکی نزیک لە ئاکپارتی وەرگیراوە، لەم ماوەیەدا دوور لە چاوی کامێراکان کار لەسەر ڕێکخستنی ئەم کۆبوونەوەیە کراوە و هەردوولا لەسەر کۆمەڵێک پرس ڕێکدەکەون.