سەرۆکی لیستی کۆمەڵ دوای دەرنەچوونی؛ قۆناغی داهاتوو دەکەینە قۆناغی بەخۆداچوونەوە

ئاڤا نیوز

 

محەممەد حەکیم، سەرۆکی لیستی کۆمەڵی دادگەریی کوردستان لە بازنەی سلێمانی دوای دەرنەچوونی و نەهێنانی دەنگی پێویست دەڵێت، "کۆمەڵی دادگەری، دەرفەتی باشی لەبەردەمدایە بۆئەوەی قۆناغی داهاتوو بکاتە قۆناغی بەخۆداچوونەوە و چاکسازیی لەهەر کەمتەرخەمی و هەڵەیەك".

 

وێنە گەورەکە؛ ئێوارەی ڕۆژی پێنجشەممە کۆمیسیۆنی باڵای سەربەخۆی هەڵبژاردنەکانی عێراق ئەنجامی بەرایی دەنگدانی تایبەت و گشتی بۆ هەڵبژاردنی پەرلەمانی عێراق بڵاو کردەوە. کۆمەڵی دادگەری ژمارەی دەنگەکانی لەچاو هەڵبژاردنی پەرلەمانی کوردستان کەمی کرد و 49 هەزار و 754 دەنگی بەدەستهێنا، بەمەش تەنیا یەک کورسی پەرلەمانی عێراقی مسۆگەر کرد .

ڕاگەیێنراوی فەرمی؛ محەممەد حەکیم، سەرۆکی لیستی کۆمەڵی دادگەریی کوردستان لە بازنەی سلێمانی، لە لاپەڕەی تایبەتی خۆی لە فەیسبووك پەیامێکی بڵاوی کردووەتەوە و نووسیوویەتی،  "کۆمەڵی دادگەری، دەرفەتی باشی لە بەردەمدایە بۆئەوەی قۆناغی داهاتوو بکاتە قۆناغی بەخۆداچوونەوە و چاکسازیی لەهەر کەمتەرخەمی و هەڵەیەك".

 

زانیاریی زیاتر؛ لە بەشێکی دیکەی نووسینەکەیدا سەرۆکی لیستی کۆمەڵی دادگەری دەڵێت، "من وەك کاندیدێك ئەوەی توانیم و لەدەستم هات ئەنجامم دا، هەر چەند ئەنجامەکە بەدڵی ئێمە نییە بەڵام سوپاس بۆ خوای گەورە کە بەدەنگەکانی ئێوە کۆمەڵ لە پەرلەمانی بەغداد دانابڕێت. خۆم بە بەرپرسیار دەزانم لە ئێستا و داهاتوو داواکارم لە خودای باڵا دەست پشتیوانمان بێ و بەرچاوڕوونیمان پێ ببەخشێ و لە گوناه و کەمتەرخەمیمان خۆش بێت".

 

ئەمەش بزانە؛ کۆمەڵی دادگەریی کوردستان لە هەڵبژاردنی پەرلەمانی عێراق بۆ ساڵی 2021، 86 هەزار و 901 دەنگی بەدەستهێنا  و  یەک کورسی لە بازنەی سلێمانی بردەوە. پاشان لە هەڵبژاردنی 2024ـی پەرلەمانی کوردستان، 59 هەزار و 831 دەنگی بەدەستهێنا، لە بازنەی هەولێر یەک کورسی و لە بازنەی سلێمانی دوو کورسی پەرلەمانی بردەوە، بەپێی ئەنجامە بەراییەکانیش بۆ هەڵبژاردنی 2025 پەرلەمانی  عێراق بۆ کۆمەڵ دڵخۆشکەر نەبوو ئەمەش دوای ئەوەی 49 هەزار و 749 دەنگی بەدەستهێنا و و تەنیا یەک کورسی پەرلەمانی بردەوە.