سەرکردەیەکی حیکمە لەبارەی کاندیدبوونی مالیکی: بەبێ کۆدەنگی تێناپەڕێت

ئاڤا نیوز

وادەی دەستووریی بۆ دیاریکردنی کاندیدی سەرۆکوەزیرانی عێراق لەکۆتایی نزیک بووەتەوە، ئەندامێکی چوارچێوەی هەماهەنگیش دەڵێت، کاندیدی سەرۆکوەزیران دەبێت کۆدەنگی لەسەربێت و بەبێ کۆدەنگی تێناپەڕێت.

وێنە گەورەکە: بەپێی عورفی سیاسی، پۆستی سەرۆککوەزیرانی عێراق پشکی شیعەکانە، لەنێو شیعەکانیش تائێستا هەموو ئەگەرەکان ئەوەن کە چوارچێوەی هەماهەنگی ناوی نووری مالیکی پەسند کردووە بۆ وەرگرتنی ئەو پۆستە.

لێدوانی فەرمی: فەهد جبووری، سەرکردە لە ڕەوتی حیکمەی نیشتیمانیی کە یەکێکە لە لایەنە کاریگەرەکانی چوارچێوەی هەماهەنگی بە ڕۆژنامەی سەباحی ڕاگەیاندووە، لەناو سەرکردەکانی چوارچێوەی هەماهەنگی گفتوگۆکان بەردەوامن و تائێستا نەگەیشتوونەتە قۆناغی یەکلاییکەرەوە، بەڵام گفتوگۆکان "قووڵ و جددین".

ئاماژەی بەوەشکرد، کەشی کۆبوونەوەکان ئەرێنییە و ڕێککەوتنیش هەیە کە بە هەموو شێوەیەک پارێزگاری لە یەکگرتوویی چوارچێوەی هەماهەنگی بکرێت، ئەویش بە خۆبەدوورگرتن لە بڕیارێک کە ببێتەهۆی دابەشبوون.

ئەوەی پێویستە بیزانیت: جبووری پێشتر بوونی کۆدەنگی لەسەر کاندیدبوونی مالیکی ڕەتکردبووەوە و  ڕایگەیاندبوو، بەهۆی ئەوەی لە ئاستی سیاسەتی ناوخۆدا ڕەتکراوەتەوە، پاڵپشتی مەرجەعیەتیشی بۆ نییە و لە ڕازیکردنی هەموو لایەنەکانی چوارچێوەی هەماهەنگیش سەرکەوتوو نەبووە تا ببێتە سەرۆکوەزیران، بۆیە ناتوانێت ببێتە سەرۆکوەزیرانی داهاتوو.