لێکۆڵێنەوە لە دۆسیەی کڕینی تاهۆ ڕەشەکانی کەرکووک دەکرێت

ئاڤا نیوز

جارێکی دیکە بابەتی کڕینی تاهۆ ڕەشەکانی ئەنجوومەنی پارێزگای کەرکووک دەبێتەوە هەواڵی میدیاکان و ئەمجارە لێکۆڵێنەوە لە دۆسیەی کڕینیان دەکرێت و داواکاری گشتیی کەیسەکە ڕەوانەی دەستەی دەستپاکی دەکات.

وێنە گەورەکە: دوای بڵاو کردنەوەی دۆسیەی کڕینی 16 ئۆتۆمبێلی جۆری تاهۆ بۆ ئەندامانی ئەنجوومەنی پارێزگای کەرکووک لە لایەن ئاڤا میدیاوە، بابەتی کڕینی ئەو ئۆتۆمبێلانە بوو بە باسی شەقامەکان و  پارێزەرێکیش بە پشتبەستن بەو بەڵگانەی ئاڤا، لە داواکاری گشتی سکاڵای کردووە، داواکاری گشتیش  کەیسەکەی ڕەوانەی دەستەی نەزاهە کردووە.

ئەوەی پێویستە بیزانیت: ئەو سکاڵایەی  کە ئاراستەی داواکاریی گشتی کراوە، دوو خاڵ لەخۆی دەگرێت:

- خاڵێکی یەکەم ئەوەیە، بەپێی نووسراوەکەی ئەنجوومەنی پارێزگای کەرکووک، ئەو تاهۆیانە بۆ دامودەزگاکانی حکومەت کڕاون، نەک ئەندامانی ئەنجوومەن. کەچی هەموویان دراون بە ئەندامانی ئەنجوومەنی پارێزگای کەرکووک.

- خاڵی دووەم ئەوەیە کە گەندەڵی لە کڕینیان کراوە، بۆ هەر ئۆتۆمبێلێک نرخەکەی نزیکەی حەوت بۆ 10 هەزار دۆلار لە نرخی بازاڕ گرانتر کڕاوە.

زانیاریی پەیامنێر: هەرچەندە هەژار کاکەیی دەڵێ، لە داواکاری گشتییەوە کەیسەکە ڕەوانەی دەستەی نەزاهە کراوە، بەڵام سەرچاوەیەک لە دەستەی نەزاهەی عێراقەوە بە ڕۆکان جاف، پەیامنێری ئاڤای وتووە، "ئەو کەیسەمان بەدەست نەگەیشتووە".