ئەنساروڵڵای یەمەنی ئاماری کۆتایی دوایین هێرشە ئاسمانییەکەی ئیسرائیل بڵاودەکاتەوە

ئاڤا نیوز

گرووپی "ئەنساروڵڵا"ی یەمەنی، ئاماری کۆتایی هێرشە ئاسمانییەکانی ئیسرائیلی ڕاگەیاند کە چەند ڕۆژێک لەمەوبەر ئەندامانی حکومەت و سەرۆکوەزیرانی لە سەنعا کردبووە ئامانج.

چیرۆکی سەرەکی: ڕۆژی پێنجشەممەی ڕابردوو 28-8-2025، ئیسرائیل هێرشێکی بەرفراوانی کردە سەر سەنعای پایتەختی یەمەن کە بووە هۆی کوژرانی سەرۆکی حکومەتی بزووتنەوەی ئەنساروڵڵا "حوسییەکان" و ژمارەیەک وەزیر.

بڵاوکراوەی فەرمی: بەگوێرەی ماڵپەڕی "RT عەرەبی"ی ڕووسی، ئاماری کۆتایی بریتیییە لە کوژرانی سەرۆکوەزیرانی حکومەتی "ئەنساروڵڵا"ی حووسی لە یەمەن و بەڕێوەبەری نووسینگەکەی و نۆ وەزیر لە هێرشە ئاسمانییەکانی ئیسرائیل بۆ سەر سەنعا.

ئەوەی پێویستە بیزانیت: ئەمڕۆ دووشەممە لە گۆڕەپانی "سەبعین" لە سەنعا ڕێوڕەسمی بەخاکسپاردنی ڕەحەوی و ژمارەیەک لە وەزیرەکانی بەڕێوەچوو.

زانیاریی بەدەستهاتوو: هەرچەندە تائێستا حووسییەکان بە فەرمی تەنیا کوژرانی سەرۆکوەزیرانی حکومەتەکەیان پشتڕاستکردووەتەوە، بێ ئەوەی ناوی وەزیرەکان بڵاوبکەنەوە، بەڵام بەگوێرەی هەژمارەکانی سۆشیاڵ میدیای نزیک لە حووسییەکان و ماڵپەڕی عەرەبی جەدیدی قەتەری پاڵپشت بە سەرچاوەکانی لە یەمەن، ئەو وەزیرانەی گیانیان لەدەستداوە بریتین لە:

- ئەحمەد غالب ڕەهوی، سەرۆکوەزیران

- جەمال عامر، وەزیری دەرەوە

- هاشم شەرەفەدین، وەزیری ڕاگەیاندن

- عەلی سەیف، وەزیری کارەبا

- محەممەد مەدانی، وەزیری ئیدارەدانی ناوخۆ

- محەممەد عیاش، وەزیری گواستنەوە

- محەممەد مەولوود، وەزیری وەرزش و لاوان

- حەسەن سەعدی، وەزیری پەروەردە

- سەمیر باجەعلە، وەزیری کاروباری کۆمەڵایەتی

- هاوکات محەممەد غەماری، سەرۆکی ئەرکانی حووسییەکان بە سەختی بریندار بوو، بەڕێوەبەری نووسینگەکەیشی کوژراوە.