بۆ کۆتاییهێنان بە جەنگ و ڕێککەوتنی بازرگانی ترەمپ سەردانی ئاسیا دەکات

ئاڤا نیوز

دۆناڵد ترەمپ، سەرۆکی ئەمریکا، گەشتێک بۆ ئاسیا دەکات و یەکەم وێستگەشی مالیزیا دەبێت، بڕیارە بەشداری لە لووتکەی ئاسیادا بکات و لە کۆریاش خۆپیشاندان دژی سەردانی ترەمپ دەستیپێکردووە.

زانیاریی بەدەستهاتوو: چاوەڕوان دەکرێت لە مالیزیا ترەمپ ڕێککەوتنی بازرگانی لەگەڵ ئەو وڵاتەدا واژۆ بکات، هەر لەو وڵاتەش بە نێوەندگیری ئەو ڕێککەوتنی ئاشتی لە نێوان تایلەند و کەمبۆدیا واژۆ بکرێت.

لێدوانی فەرمی: دۆناڵد ترەمپ، سەرۆکی ئەمریکا ڕایگەیاند، لە لووتکەی ئاسیا لەگەڵ لویس دا سێلڤا، سەرۆکی بەڕازیل کۆدەبمەوە، کە چاوەڕوان دەکرێت کۆبوونەوەکەیان تایبەت بێت بە باشترکردنی پەیوەندییەکانی نێوانیان.

زانیاریی زیاتر: دوای مالیزیا، دۆناڵد ترەمپ ڕۆژی سێشەممە بەرەو ژاپۆن بەڕێدەکەوێت و لە تۆکیۆی پایتەختی ئەو وڵاتە گفتوگۆ لەسەر ئەو باجانە دەکرێت کە ئیدارەی ترەمپ بەسەر کاڵاکانی ژاپۆنیدا سەپاندووە.

ئەوەی پێویستە بیزانیت: دوا وێستگەی سەردانەکەی ترەمپ بڕیارە کۆریای باشور بێت و ڕۆژی چوارشەممە لەو وڵاتە بەشداری لە لووتکەی ئاپێک بکات و هەر لەو سەردانەیەدا ترەمپ ڕۆژی پێنج شەممە لەگەڵ شی جینپینگ، سەرۆکی چین کۆدەبێتەوە بۆ گفتوگۆکردن لەسەر ململانێ بازرگانییەکانی نێوان ئەمریکا و چین و ڕاگرتنی ناردنی ماددە هۆشبەرەکان بۆ ئەمریکا کە ئیدارەی ترەمپ چینی پێ تۆمەتبار دەکات.

بە تەنیشت ئەم بابەتەوە: بە سەدان کەس لە خەڵکی کۆریای باشوور لە سیئۆلی پایتەختی ئەو وڵاتە دژی هاتنی ترەمپ بۆ وڵاتەکەیان خۆپیشاندانیان ئەنجامدا و ناڕەزاییان دەربڕی.