ئەمریکا پێدانی پۆستی باڵا لە گرووپە چەکدارەکانی عێراق قەدەغە دەکات

ئاڤا نیوز

مارک ساڤایا، نێردەی تایبەتی ئەمریکا، پەیامێکی توندی گەیاندووەتە سەرکردەکانی شیعە و تێیدا ڕەتیدەکاتەوە هیچ پۆستێکی باڵا بدرێ بەو کەسانەی سەر بە گرووپە چەکدارەکانن.

لێدوانی فەرمی: عامر فایز، سەرۆکی فراکسیۆنی تەسمیم لە چوارچێوەی هەماهەنگی ڕایگەیاند: مارک ساڤایا، نێردەی ترەمپ، پەیامێکی نووسراوی پێگەیاندووین کە تێیدا ئەمریکا ڕەتیدەکاتەوە گرووپە چەکدارەکان پۆستی باڵا وەربگرن، بەتایبەتی پۆستی جێگری سەرۆکی پەرلەمان.

زانیاریی زیاتر: پەیامەکەی ئەمریکا بە شێوەیەکی تایبەت ئاراستەی سەرکردەکانی شیعە کراوە و تێیدا جەخت لەوە کراوەتەوە کە بوونی کەسایەتییەکانی سەر بە گرووپە چەکدارەکان لە پۆستە مەدەنییە باڵاکان لای واشنتن قبووڵنەکراوە.

ئەوەی پێویستە بیزانیت: ئەمە لە کاتێکدایە کە عەدنان فەیحان، سەرۆکی بزووتنەوەی سادیقوون و کەسی نزیک لە عەسائیبی ئەهلی حەق، پۆستی جێگری یەکەمی سەرۆکی پەرلەمانی لەدەستە. سەرکردەکانی چوارچێوەی هەماهەنگی ئەم داواکارییەی ئەمریکا وەک "دەستێوەردان لە کاروباری ناوخۆ" دەبینن و بەنیازن لەرێگەی نامەیەک یان ناردنی شاندێکەوە بۆ واشنتن، داوای ڕوونکردنەوە بکەن.

ئەوەی لەبارەیەوە دەگوترێت: هاوکات پێشبینی دەکرێت عەسائیب بەهۆی ئەم فشارە نێودەوڵەتییانەوە لە کابینەی داهاتوو پاشەکشە بکات، هەرچەندە لایەنە شیعەکان هەبوونی هەر جۆرە هەڕەشەیەکی ڕاستەوخۆیان بۆ بڕینی دۆلار لەلایەن ئەمریکاوە ڕەتکردووەتەوە.