سەرۆکوەزیرانی لوبنان: سەقامگیری سووریا بەمانای ئاشتی لە لوبنان دێت

ئاڤا نیوز

 

سەرۆکوەزیرانی لوبنان وەک یەکەم سەرکردەیی باڵای لوبنانی لەدوای کەوتنی دەسەڵاتی بەشار ئەسەدەوە سەردانی دیمەشقی کرد، هەردوو وڵات ئامادەییان بۆ پەیوەندییەکی برایانە و بەهێز دەربڕی.

 

وێنە گەورەکە: دوای 15 ساڵ، ئەمڕۆ شەممە نەجیب میقاتی، سەرۆکوەزیرانی لوبنان سەردانی سووریای کرد و لەگەڵ ئەحمەد شەرع، بەرپرسی ئیدارەی نوێی سووریا لە کۆشكی گەل لە دیمەشق کۆبوونەوە.

 

لێدوانی فەرمی: کۆنگرەیەکی ڕۆژنامەوانی لەنێوان ئەحمەد شەرع و نەجیب میقاتی ئەنجامدرا و تیادا چەند خاڵێک ئاماژەی پێدرا:- 

 

- میقاتی هیوای ئاشتی و سەقامگیری بۆ سووریای نوێ خواست، هاوکات داوای پەیوەندییەکی بە‌هێزی بۆ هەردوو وڵات کرد، وتیشی سەقامگیری سووریا بەمانای ئاشتی لە لوبنان دێت.

 

- هاوکات ئەحمەد شەرع، هەماهەنگی بەرزی نێوان سووریا و لوبنانی دووپاتکردەوە، جەختی لە پەیوەندیی برایەتیی نێوان سووری و لوبنانییەکان کردەوە.

 

- لە کۆبوونەوەی نێوان هەردوولا جەخت لە پرسی کۆچبەر، سنوور و پەیوەندیی ستراتیژی نێوان هەردوو وڵات کرایەوە.

 

ئەمەش بزانە: ئەم سەردانەی میقاتی بۆ سووریا لەسەر داوای ئەحمەد شەرع بووە.