بە تۆمەتی "سیخوڕیکردن" بڕیاری زیندانیکردن بۆ ئەکرەم ئیمامئۆغڵو دەرچوو

ئاڤا نیوز 

ئەکرەم ئیمامئۆغڵو، سەرۆکی لەکارلادراوی شارەوانیی ئیستانبووڵ و کاندیدی جەهەپە بۆ هەڵبژاردنی داهاتووی سەرۆکایەتیی کۆماری تورکیا، لە کاتێکدا پێشتر بە تۆمەتی "گەندەڵی و بەرتیل وەرگرتن" خرایە زیندان، ئێستا بە تۆمەتی "سیخوڕیکردن" زیندانی دەکرێت و لای خۆیشیەوە تەواوی ئەو تۆمەتانە ڕەت دەکاتەوە.

بڵاکراوەی فەرمی: دوای وتە لێوەرگرتنیان کە 11 کاتژمێری خایاند، دادگای سوڵحی تاوانەکان لە ئیستانبووڵ بە تۆمەتی دروستکردنی تۆڕێکی "سیخوڕیی سیاسی" لە بەرژەوەندی بەریتانیا و ئەمەریکا، بڕیاری زیندانیکردنی بۆ هەریەک لە ئەکرەم ئیمامئۆغڵو، مەردان یەنارداغ، بەڕێوەبەری گشتیی کەناڵی تەلە 1 و نەجاتی ئۆزکان، بەڕێوەبەری هەڵمەتی بانگەشەی هەڵبژاردنی ئەکرەم ئیمامئۆغڵو دەرکرد. 

بە تەنیشت ئەم بابەتەوە: لە بڕیارەکەی دادگادا بانگەشەی ئەوە کراوە کە ئەکرەم ئیمامئۆغڵو سەرۆکایەتیی تۆڕەکەی کردووە تاوەکوو بتوانێت لەسەر ئاستی نێودەوڵەتیی هاوکاری بۆ هەڵمەتی بانگەشەی سەرۆکایەتیی کۆمار کۆبکاتەوە. لەسەر ڕاسپاردەی ئیمامئۆغڵوش بۆ سیخوڕی زانیاری لەسەر چەندین هەژماری تۆڕە کۆمەڵایەتییەکان و داتاکانی شارەوانیی گەورەشاری ئیستانبووڵ کۆکراوەتەوە.

ئەوەی پێویستە بیزانیت: مەردان یەنارداغیش کەناڵی تەلە 1'ی وەک میدیای ئەم تۆڕە سیخوڕییە بەکارهێناوە و کەناڵەکە هەوڵی بەلاڕێدابردن و چەواشەکردنی بینەرانی داوە. ئەمەش لە کاتێکدایە سێ ڕۆژ لەمەوبەر یەنارداغ لەکارەکەی لادرا و ڕۆژنامەنووسێکی نزیک لە ئاک پارتی بە قەییوم لەجێی دانرا.

لە لایەکی دیکەوە: خودی ئەکرەم ئیمامئۆغڵو کە چەند ڕۆژێک دوای ئەوەی ڕایگەیاند خۆی کاندید دەکات بۆ هەڵبژاردنی داهاتووی سەرۆکایەتی کۆمار لە 19-3-2025 دەستگیر کرا، پاشان بە تۆمەتی ئەنجامدانی گەندەڵی بریاری زیندانیکردنی بۆ دەرچوو و لە سەرۆکایەتیی شارەوانیی گەورەشاری ئیستانبووڵ دوورخرایەوە و ئۆزگور ئۆزەل، سەرۆکی گشتیی جەهەپە و بەرەی ئۆپۆزسیۆن لە تورکیا بە تووندترین شێوە ئەم تۆمەتانە ڕەت دەکەنەوە و بانگەشەی ئەوە دەکەن کە دەسەڵاتی دادوەری کراوەتە ئامرازی دەست دەسەڵاتی سیاسی بۆ سەرکوتکردنەوە و دەست و پێ بەستنی ئۆپۆزسیۆن.