لە ماوەی چەند کاتژمێرێکدا چوار بوومەلەرزەی بەهێز پارێزگایەکی تورکیا دەهەژێنن

ئاڤا نیوز 

دوای ئەو بوومەلەرزە بەهێزانەی درەنگانی شەوی ڕابردوو بە گوڕی 6.1 و 4.2 پلەی ڕێختەر پارێزگای باڵکئەسیر'یان لە خۆرئاوای تورکیا هەژاند، کاتژمێر 5:36ی بەرەبەیانی ئەمڕۆش بوومەلەرزەیەکی دیکە بە گوڕی چوار پلە بە پێوەری ڕێختەر ئەو پارێزگایەی هەژاندەوە.

بڵاوکراوەی فەرمی: بەپێی ئەو زانیارییانەی دەزگای بەڕێوەبردنی دۆخی لەناکاو و کارەساتەکان (ئافاد) بڵاویکردووەتەوە، بۆ جارێکی دیکە بوومەلەرزەیەک بە گوڕی چوار پلە بە پێوەری ڕێختەر شارۆچکەی سندرگی لە پارێزگای باڵکئەسیر هەژاندووە.

زانیاریی زیاتر: لە شەوی ڕابردووەوە بوومەلەرزە نەیهێشتووە ئەو پارێزگایەی تورکیا بخەوێت و خەڵک لە ترسی گیانی خۆیان لە ماڵەکانیان چوونە دەرەوە و شەویان لەژێر باران بەسەربرد.

- ئەم بوومەلەرزەیە لە قوڵاییی 7 کیلۆمەتر لە چینی زەویدا ڕووی داوە.

ئەوەی پێویستە بیزانیت: بوومەلەرزەی یەکەم  کاتژمێر 10:48 شەوی ڕابردوو ڕوویدا، گوڕەکەی 6.1 پلە بە پێوەری ڕێختەر بوو، پارێزگای باڵکئەسیری هەژاند، سێ پاشلەرزە بە گوڕی 4.1، 3.5 و 3.9 ڕوویان دا.  

- بوومەلەرزەی یەکەم لە قوڵایی 5.9 کیلۆمەتر لە توێکڵی زەویدا ڕووی دابوو.

- بەرەبەیانی ئەمڕۆ دەرکەوت بە هۆی بوومەلەرزەکانەوە سێ باڵەخانە بە تەواوی داڕووخاون و لەگەڵ زەوی تەخت بوون.

- بەپێی ئامارە فەرمییەکان بەهۆی بوومەلەرزەکانەوە کەس گیانی لەدەست نەداوە، تەنیا 18 کەس بە سووکی بریندار بوون. 

- بوومەلەرزەکە لە هەریەک لە پارێزگاکانی ئیزمیر، بورسا، ئیستانبووڵ، تەکیرداغ، کۆجائەلی و ساکاریا هەستی پێ کراوە و بە هۆی بوومەلەرزەکانەوە ئەمڕۆ لە ناوەندەکانی خوێندن لە باڵکئەسیر کراوەتە پشوو. 

- تەنها لە کاتژمێر نیو کاتژمێری دوێنێ شەو 26 پاشلەرزە ڕوویان داوە، کە بەهێزترینیان بە گوڕی 4.2 پلە بە پێوەری ڕێختەر بووە.

باکگراوند: ئەوەی جێی سەرنجە 10.8.2025، بومەلەرزەیەک بە گوڕی 6.1 پلە بە پێوەری ڕێختەر هەمان ناوچەی پارێزگای باڵکئەسیری هەژاند.