لە ڕێگەی پڕۆژەیەكەوە ئاوی قورسی هەولێر دووبارە بەكاردەهێندرێتەوە

ئاڤا نیوز

پڕۆژەی ڕیسایكلینی ئاوی قورسی هەولێر كە یەكێكە لە گرنگترین پڕۆژە ستراتیژییە ژینگەییەكان و بەم نزیكانە تەواو دەبێت و لەو ڕێگەیەوە ئاوی قورسی شارەكە جارێكی دیكە بۆ ئاودانی سەوزایی بەكاردەهێندرێتەوە.

وێنە گەورەکە: سەرەڕای دروستکردنی ئاستەنگەکانی بەغدا، حکومەتی هەرێمی کوردستان بەردەوامە لە جێبەجێکردنی پرۆژە ستراتیژییەکان، ئەمڕۆ دوای ڕاگەیاندنی قۆناغی یەکەمی پرۆژەی فریاگوزاریی خێرای ئاوی هەولێر، حکومەتی هەرێمی کوردستان لە پلانیدا هەیە ئاوی قورس ڕیسایكلین بکات و دووبارە بۆ بەكارهێناوەی لە باخچەكان، لە ئاودانی سەوزاییەكان بەکاربهێنرێتەوە، پرۆژەکەش بە زوویی دەخرێتە كار و جێبەجێی دەكرێت.

لێدوانی فەرمی: ئاری ئەحمەد، بەڕێوەبەری گشتیی ئاو و ئاوەڕۆی هەرێمی کوردستان بە ئاڤا میدیای ڕاگەیاند: قۆناغی یەكەمی پڕۆژەكە جێبەجێ كراوە و لە ڕۆژانی داهاتووش دەست بە جێبەجێكردنی قۆناغی دووەمی پڕۆژەكە دەكرێت، لە قۆناغی یەكەمدا ئاوی قورسی بازنەی 120 مەتریی لەڕێگەی هێڵێكەوە دەگواسترێتەوە بۆ وێستگەی سەرەكی.

زانیاریی زیاتر: بەپێی گوتەی بەڕێوەبەری گشتیی ئاو و ئاوەڕۆ،  ئاوە قورسەكە لە وێستگەی سەرەكی كۆدەكرێتەوە و بەشێوازێكی پێشكەوتوو و لەڕێگەی فلتەرەوە دەپاڵێورێت و پاشان بۆ ئاودانی سەوزایی بەكاردەهێندرێتەوە و هاوكات بۆ ئاودێری پشتێنەی سەوزایی هەولێر و ئاودانی پارك و باخچەكانی هەولێریش سوودی دەبێت.

ئەمەش بزانە: پڕۆژەی ڕیسایكلینی ئاوی قورسی هەولێر پرۆژەکە لە ڕۆژێكدا توانای پاککردنەوەی 840 هەزار مەتر سێجا ئاوی بەفیڕۆچوو و قورسی هەیە.