لە وەرزی کەڵە هەرز شوێنی ڕاوچییان تێکدەدرێت

ئاڤا نیوز

وەرزی جووتبوونی باڵندە و ئاژەڵە کێوییەکانە، پۆلیسی دارستان و ژینگە لە ناوچە جیاوازەکان ڕێگری لە ڕاو دەکەن، لە سنووری دەربەندیخانیش چەند حەشارگەیەکی ڕاوچیان تێک درا.

وێنە گەورەکە: بەئامانجی پارێزگاری لە ژیانی ئاژەڵ و باڵندە کێوییەکان و ڕێگریکردن لە سەرپێچیکارانی ژینگە، ساڵانە پۆلیسی دارستان و ژینگەی پارێزگای سلێمانی، لە وەرزی جووتبوونی ئاژەڵ و باڵندەکان دا کە بە وەرزی کەڵە هەرز ناسراوە ئامادەکاریی دەکات و تیمەکانیان زیاتر دەکەن.   

لێدوانی فەرمی: عەمید هێمن کەمەرخان ئەفەندی، بەڕێوەبەری ڕاگەیاندنی بەڕێوەبەرایەتیی پۆلیسی دارستان و ژینگەی پارێزگای سلێمانی بە ئاڤای ڕاگەیاند، ئەمڕۆ بەشی پۆلیسی دارستان و ژینگەی دەربەندیخان کێوماڵێکیان ئەنجامدا، توانیان پێنج حەشارگە تێکبدەن کە لەلایەن ڕاوچی و سەرپێچیکاران دروستکرابوون و ئامادە کرابوون بەمەبەستی ڕاوکردنی ئاژەڵ و باڵندە کێویەکان.

بەوتەی عەمید هێمن کەمەرخان، حەشارگەکان دەکەونە هەریەکە لە ناوچەکانی وڵوەر، کۆکۆی، کانی کەوە و پۆڵەی سەرو چیای زەڵی دروستکردبوو.

ئەمەش بزانە: ساڵانە بەڕێوەبەرایەتیی پۆلیسی دارستان و ژینگەی پاریزگای سلێمانی، لە "وەرزی کەڵە هەرز" کە بە وەرزی جووتبوونی ئاژەڵ و باڵندەکان دادانرێت، چالاکییەکانیان زیاتر دەکەن، چونکە ڕاوچییەکان سوود لە وەرزە وەردەگرن بۆ ڕاوکردن و ئاسانتر نێچیرەکانیان بۆ ڕاودەکەن کە لە ناوەڕاستی مانگی تشرینی دووەم دەست پێدەکات ماوەی مانگێک دەخایەنێت.

ئامارەکان وادەڵێن: لە هەشت مانگی ئەمساڵدا لە سنوری بەڕێوەبەرایەتیی پۆلیسی دارستان و ژینگەی سلێمانی، 773 سەرپێچیکاری ژینگەیی دەستگیرکراون، 26  تاپڕ، 85 فیشەکی تاپڕ، 35  کلاشینکۆف، 95 باڵندی جۆراجۆر، 19  باڵندی کێوی، 5  ئاژەڵی کێوی، 53  قەفەس و چەندین کەل و پەلی دیکەی ڕاوکردن دەستییان بەسەردا گیراوە.