گومرگی عێراق دەنگۆی 10 هێندە زیادکردنی باجی سەر دەرمان ڕەت دەکاتەوە

ئاڤا نیوز

دەستەی گشتیی گومرگی عێراق، ئەو دەنگۆیانە ڕەت دەکاتەوە کە باس لە زیادکردنی باجی گومرگی سەر دەرمان بۆ 10 هێندە دەکەن و ڕایدەگەیێنێت، ئەوەی بڵاوکراوەتەوە تەنیا "هەڵەیەکی چاپی بێ مەبەست" بووە.

ڕاگەیێنراوی فەرمی: دەستەی گشتیی گومرگی عێراق لە ڕاگەیێنراوێکدا ڕوونی کردەوە، ڕێژەی گومرگ لەسەر دەرمان وەک خۆی بە (0.05٪) ماوەتەوە و هیچ گۆڕانکارییەکی بەسەردا نەهاتووە، تەنیا باجی سەر پێداویستییە پزیشکییەکان بە ڕێژەی 1% زیاد کراوە و لە 4%ـەوە کراوە بە 5%.

دەستەکە ئاماژەی بەوەش دەدات، ئەم هەنگاوە لە چوارچێوەی ڕێکخستنەوە و یەکخستنی پێوەرە گومرگییەکانە بۆ چەسپاندنی دادپەروەریی باج، نەک سەپاندنی ڕەسمی نوێ یان زیادکردنی نایاسایی. هەروەها جەختی کردەوە کە دەرمانە سەرەکییەکان و پێداویستییە مرۆییەکان هێشتا لە باج بەخشراون یان ئاسانکارییان بۆ دەکرێت، بە جۆرێک کە هیچ بارگرانییەک بۆ سەر هاووڵاتییان و نرخی دەرمان لە بازاڕەکاندا دروست نەبێت.

لەلایەکی دیکەوە: لە وەڵامی هۆشدارییەکانی سەندیکای دەرمانسازانیشدا، دەستەکە داوای کرد لەبری بڵاوکردنەوەی ئاماری نادروست کە ببێتە هۆی دڵەراوکێی گشتی، پەنا بۆ دیالۆگی تەکنیکی و هەماهەنگیی هاوبەش ببرێت. گومرگی عێراق دووپاتی کردەوە کە دەرگایان کراوەیە بۆ هەموو لایەک بە مەبەستی پاراستنی ئابووریی نیشتمانی و دابینکردنی دەرمان بە نرخێکی جێگیر و دادپەروەرانە.