دوای 30 ساڵ؛ سوورێژە لە ئەمریکا دەبێتەوە بە هەڕەشە

ئاڤا نیوز

ژمارەی تووشبووان بە نەخۆشیی سوورێژە لە ویلایەتە یەکگرتووەکانی ئەمریکا گەیشتە بەرزترین ئاست لە ماوەی سێ دەیەی ڕابردوودا؛ ئەمەش کەرتی تەندروستیی ئەو وڵاتەی ڕووبەڕووی تەحەدایەکی مێژوویی کردووەتەوە.

وێنە گەورەکە: ئەمریکا کە لە ساڵی 2000ـەوە بە فەرمی وەک وڵاتێکی "پاک لە سوورێژە" (Eliminated status) ناسراوە، ئێستا لەبەردەم مەترسیی لەدەستدانی ئەو نازناوە نێودەوڵەتییەدایە. ئەگەر بڵاوبوونەوەی ڤایرۆسەکە بەم شێوەیە بەردەوام بێت، تاوەکو کۆتایی مانگی کانوونی دووەمی 2026، پێگەی تەندروستیی ئەمریکا لە ئاستی جیهان پاشەکشەیەکی گەورە بەخۆیەوە دەبینێت.

ژمارەکان وادەڵێن: لە ساڵی 2024 تەنها 285 حاڵەت هەبوو، بەڵام ئێستا ژمارەکە بۆ سەروو 2 هەزار بەرزبووەتەوە, 93٪ی تووشبووان ئەو کەسانەن کە ڤاکسینیان وەرنەگرتووە یان دڵنیا نین لە کوتانیان.

بۆچی گرنگە: ئەم قەیرانە تەندروستییە هاوکاتە لەگەڵ دەستبەکاربوونی ڕۆبێرت ئێف کەنەدی جونیەر، وەک وەزیری تەندروستیی ئەمریکا. کەنەدی کە بەردەوام گومانی لەسەر کاریگەریی ڤاکسینەکان دروست کردووە، مەترسییەکانی سوورێژەی بە "کەم" نیشان داوە، ئەمەش نیگەرانیی قووڵی لای زاناکان دروست کردووە کە بانگەشەکانی ئەو ببێتە هۆی زیاتر پاشەکشەکردنی پرۆسەی کوتان.

زانیاریی زیاتر: شارەزایان هۆشداری دەدەن کە ویلایەتی تێکساس یەکێکە لەو ناوچانەی زۆرترین مەترسیی لەسەرە. ئەگەر ئەمریکا نەتوانێت لە چەند هەفتەی داهاتوودا سەرکوتکردنی ڤایرۆسەکە ڕابگەیەنێت، بۆ یەکەمجار لە دوای 26 ساڵ، ناسنامەی "وڵاتی پارێزراو لە سوورێژە" لەدەست دەدات، ئەمەش کاریگەریی نەرێنی لەسەر متمانەی جیهانی بە سیستەمی پزیشکیی ئەمریکا دەبێت.