گۆران ساڵح گۆرانییەکی سۆزداریی نوێ بڵاودەکاتەوە

ئاڤا نیوز

هونەرمەندی گۆران ساڵح، نوێترین ڤیدیۆ کلیپی خۆی بە ناوی "خۆشم دەوێیت" بڵاوکردەوە، کە بەرهەمێکی سۆزداری قووڵە و لە ڕووی تەکنیکی میوزیکەوە گۆڕانکارییەکی جیاوازی تێدا کراوە.

وێنە گەورەکە: ئەم بەرهەمە نوێیەی گۆران ساڵح تەنیا گۆرانییەکی کاتی نییە، بەڵکو بەهۆی جۆری ئاواز و دابەشکردنە میوزیکییەکەیەوە، پێشبینی دەکرێت ببێتە یەکێک لەو کارە هونەرییانەی وەک "گۆرانییە هەمیشە زیندووەکان" لە مێژووی میوزیکی کوردیدا بمێنێتەوە.

ئەوەی پێویستە بیزانیت: بۆ یەکەمجار لە کارەکانیدا، گۆران ساڵح گرنگییەکی بێوێنەی بە ئامێرە فوودارەکان داوە کە ناسنامەیەکی کلاسیکی و مۆدێرنیان بەخشیوە بە بەرهەمەکە: ترامپێت، فرێنچ هۆرن و ساکسفۆن، ڕیتم و هەستێکی قووڵیان بە کلیپەکە بەخشیوە.

زانیاریی زیاتر: ئاوازی گۆرانییەکە لەلایەن خودی (گۆران ساڵح)ـەوە دانراوە، تێکستەکەی لەلایەن (ڕێبوار جەبار) نووسراوە و (ڕێناس کورداخ) ئەرکی دابەشکردنی میوزیکی لە ئەستۆ گرتووە.