ساڵی ڕابردوو لە هەولێر زیاتر لە 75 هەزار بوتڵ خوێن بەخشراوە

ئاڤا نیوز

لە هەولێر، لەماوەی ساڵێكدا زیاتر لە 75 هەزار بوتڵ خوێن لە جۆری بەخشین و لەجیاتی دانان بەخشراوە، ئەوەندە خوێنی پێویستیش لەبەردەست بووە، بە درێژایی ساڵی 2025 هیچ بانگەوازێك بۆ پێویستی خوێنبەخشین نەكراوە.

چیرۆكی سەرەكی: بەڕێوەبەرایەتیی بانكی خوێنی هەولێر ئاماری ساڵی 2025ـی بڕی یەكەی خوێنی وەرگیراوی بڵاوكردەوە كە بۆ نەخۆشخانە حكومی و تایبەتەکان دابین كراوە، بەتایبەت بۆ تووشبووانی تالاسیمیا و شێرپەنجە.

لێدوانی فەرمی: د. سانع ئەبابەكر ئەرگوشی، بەڕێوەبەری بانكی خوێنی هەولێر بە ئاڤای ڕاگەیاند، كۆی گشتیی خوێنی وەرگیراو لە ساڵی 2025ـدا، 75 هەزار و 317 بوتڵ بووە كە لەو بڕە، نزیكەی 42 هەزار بوتڵ خوێن لە جۆری بەخشین و 33 هەزار و 422 بوتڵ خوێنیش بە سیستەمی لەجیاتی دانان وەرگیراوە.

زانیاریی زیاتر: بەدرێژایی ساڵی ڕابردوو، 17 هەڵمەتی خوێنبەخشین لە پارێزگای هەولێر ئەنجام دراون، بەكۆی گشتیش خوێن بۆ 59 نەخۆشخانەی كەرتی گشتی و تایبەت لە هەولێر و دەوروبەری دابین كراوە.

ئەمەش بزانە: ئەو نەخۆشیانەی كە پێویستییان بە وەرگرتنی خوێن بەشێوەیەكی بەردەوام هەیە، بەتایبەت تووشبووانی تالاسیمیا بڕی 14 هەزار و 220 بوتڵ خوێنیان بۆ دابین كراوە، هاوكات تووشبووانی شێرپەنجە بڕی 33 هەزار و 120 بوتڵ خوێنیان بۆ دابین كراوە.