هەر نەخۆشخانەیەک بە بەرنامە لەدایکبوون بۆ بەرواری جوان دابنێت، سزا دەدرێت

ئاڤا میدیا

 

بەشێوەیەكی گشتیی خەڵك بەرواری جوان بۆ لەدایكبوون هەڵدەبژێرێت، وەزارەتی تەندروستی لە ماوەكانی ڕابردوودا ئەمەی قەدەغە كردووە و لایەنی سەرپێچیكاریش ڕووبە ڕووی سزا دەكرێتەوە و بەتایبەتی چاودێریی حاڵەتەكانی لەدایكبوونی منداڵان دەكرێت لە 1-1-2026 یان 11-1-2026 و هەر رۆژێكی دیكەی هەستپێكراو.

 

بابەتی سەرەكی: ئەو ڕۆژانەی بەروارەكانیان جوانە، خەڵك بۆ لەدایكبوونی منداڵەكانیان لەو ڕۆژەدا نەشتەرگەریەكەیان پێش یان پاش دەخەن، ئەمەش كاریگەری لەسەر باری تەندروستی دایكەكە و كۆرپەكە دروست دەكات، بەڵام گوێی پێنادرێت و ئەوەی بۆیان گرنگە بەروارێكی جوانی لەدایكبوونە.

 

لێدوانی تایبەت: د.دلۆڤان محەممەد، بەڕێوەبەری گشتیی تەندروستی هەولێر بە ئاڤا میدیای ڕاگەیاند: ئەم حاڵەتانە لە نەخۆشخانە تایبەت و سەنتەرەكان زیاتر ڕوودەدەن، بۆیە لەو ڕۆژانەی بەرواری جوانە ئێمە لیژنە بۆ نەخۆشخانە تایبەت و سەنتەرەكان دەنێرین، بۆ ئەوەی لە فایل و بەڵگەنامەكان دڵنیاببینەوە.

 

-د.دلۆڤان محەممەد دەڵێت، پێشتر لەدایكبوون و نەشتەرگەرییەكان لە بەروارە جوانەكاندا وەكو بەرنامەی داواكراوبوو، بەڵام دوای دەرچوونی ڕێنماییەكانی وەزارەتی تەندروستی و قەدەغەكردنی، ئێستا زۆر كەمبووەتەوە، بەڵام ناتوانین بڵێین نەماوە.

 

لەلایەكی دیكەوە: د.سامان بەرزنجی، وەزیری تەندروستی حكومەتی هەرێمی كوردستان بە ئاڤا میدیای وت: لەم كابینەیەدا نەخۆشخانەیەك و پزیشكێك لیژنەی لێكۆڵینەوەی لەسەر دروست كرا و لێپێچینەوەیان لەگەڵ كرا، چونكە بەبێ نیشاندەری پزیشكی لیستێكیان بۆ نەشتەرگەری ژمارەیەك نەخۆش ئامادەكردبوو، بەشێك لە نەشتەرگەرییەكانیان پێشخستبوو، بەشێكی دیكەشیان دواخستبوو، ئەوەش دژی بنەمای زانستی و پزیشكییە.

 

زانیاری زیاتر: نەشتەرگەری لەدایكبوون لە نەخۆشخانەیەكی تایبەت پێشبخرێت، یان دوابخرێت بۆ بەروارێكی جوان، ئەوا سزای پێبژاردنی لە سێ ملیۆن دینارەوە دەستپێدەكات، ئەگەر سەنتەرێك نەشتەرگەرییەكە بكات سزاكەی لە ملیۆنێك دینارەوە دەستپێدەكات.