بڕیارێکی مێژوویی ژیانی 25 ملیۆن کەس ڕزگار دەکات: 'شەکرەی جۆری 5' دانی پێدانرا

ئاڤا نیوز

 

دوای دەیان ساڵ لە مشتومڕ و پشتگوێخستن، جیهانی پزیشکی دواجار دانی نا بە جۆرێکی نوێی کوشندەی شەکرە: "شەکرەی جۆری 5". ئەم نەخۆشییە بەهۆی برسێتی و بەدخۆراکییەوە دروست دەبێت و چارەسەری هەڵە لەوانەیە ببێتە هۆی مردنی نەخۆش.

 

بۆچی گرنگە: ئەم بڕیارە، کۆتایی بە دەیان ساڵ لە چارەسەری هەڵە و مردنی بێدەنگی 25 ملیۆن کەس دەهێنێت.

 

پێشتر ڕێکخراوی تەندروستیی جیهانی لە 1999 بەهۆی "نەبوونی بەڵگەی پێویست" ئەم جۆرەی لە پۆلێنکردن دەرکردبوو. ئێستا، ئەم بڕیارە نوێیە ڕێگە بۆ دەستنیشانکردنی دروست و دۆزینەوەی چارەسەری گونجاو خۆش دەکات.

 

زانیاریی زیاتر: جیاوازی ئەم جۆرە چییە لەگەڵ جۆرەکانی دیکەی نەخۆشیی شەکرە؟ ئەم جۆرە نوێیەی شەکرە هیچ پەیوەندییەکی بە قەڵەوی، شێوازی ژیان یان کێشەی کۆئەندامی بەرگرییەوە نییە. هۆکاری توشبوون بەم جۆرە نەخۆشییە؛ تەنیا برسییەتی و بەدخۆراکییە.

 

نەخۆشییەکە زیاتر لەو ناوچانەدا بڵاوە کە بەپێی پێویست خۆراکیان پێ ناگات، وەک بەشێک لە وڵاتانی ئاسیا و ئەفریقا.

 

لێدوانی فەرمی: مێریدیس هۆکینز، پسپۆڕی نەخۆشیی شەکرە، هۆشداری دەدات و دەڵێت: کێشەی سەرەکیی ئەم جۆرە نەخۆشییە "بەرهەڵستی ئینسۆلین" نییە، بۆیە چارەسەرکردنی کلاسیک نەک هەر سوودی نییە، تەنانەت دەبێتە هۆی دابەزینی شەکر لە خوێندا بە شێوەیەکی کوشندە و مردنیش.

 

هەنگاوی داهاتوو: یەکێتیی نێودەوڵەتیی شەکرە تیمێکی تایبەتی پێکهێناوە بۆ دانانی پێوەر بۆ دەستنیشانکردنی نەخۆشییەکە، دروستکردنی سیستمێکی تۆمارکردنی جیهانی بۆ توێژینەوە و ئامادەکردنی پرۆگرامی ڕاهێنان بۆ کارمەندانی تەندروستی.