عەدنان فەیحان بە جێگری یەکەمی سەرۆکی پەرلەمانی عێراق هەڵبژێردرا

 ئاڤا نیوز

 

عەدنان فەیحان، ئەندامی فراکسیۆنی سادیقوون، باڵی سیاسیی عەسایب ئەهلی حەق بەسەرۆکایەتیی قەیس خەزعەلی بە بەدەستهێنانی  177 دەنگ بە بە جێگری یەکەمی سەرۆکی پەرلەمانی عێراق هەڵبژێردرا.

 

وێنە گەورەکە: ئەمڕۆ دووشەممە ئەنجوومەنی نوێنەرانی عێراق دەرگای خۆپاڵاوتنی بۆ سەرۆک،  جێگری یەکەم و دووەمی سەرۆکی پەرلەمانی عێراق کردەوە، لە کۆی  گشتی 329 ئەندامی پەرلەمان 306 ئەندامی پەرلەمان بەشدارییان لە دەنگدانەکەدا کرد، دواجار بە زۆرینەی دەنگ بۆ بەرژەوەندیی عەدنان فەیحان دەنگیان دا، بەمەش بووە جێگری یەکەمی سەرۆکی پەرلەمانی عێراق. 

 
زانیاریی زیاتر: کاندیدەکانی جێگری یەکەمی سەرۆکی پەرلەمانی عێراق بریتی بوون لە: عەدنان فەیحان دلێمی و  موحسین مەندەلاوی

 
ئەمەش بزانە: عەدنان فەیحان دلێمی، ساڵی 1973 لە پارێزگای بابل لەدایکبووە، ساڵی 1996 بڕوانامەی دبلۆمی لە کارگێڕیدا بەدەستهێناوە لە بواری سیاسی و سەربازیدا کاری کردووە و پێشتر لێپرسراوی مەکتەبی سیاسیی عەسایب ئەهلی حەق بووە، خولی پێنجەمی پەرلەمان ماوەیەک پەرلەمانتار و سەرۆکی فراکسیۆنی سادیقوون بووە، مانگی شوباتی ساڵی 2024 بە پارێزگاری بابل هەڵبژێردراوە، ئێستاش لەم خولەدا ئەندامی فراکسیۆنی سادیقوونە. 

 

-موحسین مەندەلاوی، سەرۆکی هاوپەیمانیی ئەساسە و ئێستا هەشت پەرلەمانتاری لە پەرلەمانی عێراق هەیە و سەربە چوارچێوەی هەماهەنگیە.