دەیان هاووڵاتیی لە چۆمان گیریان خواردووە و هۆشداری دەدرێت

ئاڤا نیوز

 

بەهۆی بەفربارین و دروستبوونی ئاستەنگیی هاتووچۆ لە سنووری قەزای چۆمان دەیان هاووڵاتیی گیریان خواردووە، تیمەکان بەردەوامن لە ڕزگارکردنی هاووڵاتیان و قایمقامی چۆمانیش هۆشداری بە هاووڵاتیان و شوفێران دەدات.

 

لێدوانی فەرمی: ئەحمەد بارزان، قایمقامی چۆمان بە ئاڤا میدیای ڕاگەیاند، بەفرێکی زۆر باریوە لە سنووری چۆمان و هاووڵاتیانیش بەردەوام سەردانی ناوچەکە دەکەن، ئێستا تیمەکانمان سەرقاڵی کردنەوەی ڕێگا سەرەکییەکانن. لە ڕێگەی ئاڤاوە داوا لە هاووڵاتیان دەکەین بە هێچ شێوەیەک لە ڕێگای سەرەکی لانەدەن و سەردانی ناوچەکە نەکەن لەبەرئەوەی مەترسی لەسەر ژیانیان دروست دەبێت، تائێستا نزیکەی 35 کەسمان ڕزگار کردووە و تیمەکانمان بەردەوامن لە ڕزگارکردنی هاووڵاتییان.

 

- ئێران سنوورەکانی داخستووە لەبەرئەوەی بەفری زۆر باریوە و ناتوانن بە زوویی کۆنتڕۆڵی ڕەوشەکە بکەن و ڕێگاکە پاک بکەنەوە، ئەگەر بەو شێوە بەردەوام بێت ئێمەش ناتوانین بە زوویی ڕێگاکان پاک بکەینەوە. 

 

لەلایەکی دیکەوە: ژمارەیەک هاووڵاتیی لە ڕێگەی گۆمەسپان نزیک گوندی کێشکێ پەیوەندییان بە ئاڤاوە کردووە و داوای بە هاناوەچوون دەکەن و دەڵێن: ژمارەیەکی زۆر ژن و منداڵیش لەو سنوورە گیریان خواردووە ئەگەر بە هانامانەوە نەیەن ئەگەری مردنی ژمارەیەک هاووڵاتیی هەیە لەبەر سەرما و سۆڵەی ناوچەکە.