بەفر ڕێگەی سێ دەروازەی سنووری داخست

ئاڤا نیوز

 

بەهۆی زۆری ڕێژەی بەفربارین تەواوی ڕێگای هاتن و چوونی بازرگانی و گەشتیاری لە دەروازە سنوورییەکانی حاجی ئۆمەران، کێلێ و سەرزێر داخراون.

 

وێنە گەورەکە: جیاواز لە ڕۆژانی ڕابردووی بارانبارین، ئێوارەی ئەمڕۆ دووشەممە 29-12-2025 شەپۆڵێکی بەفربارین زۆربەی ناوچەکانی هەرێمی کوردستان گرتەوە، ژمارەیەکی زۆری هاووڵاتیان بۆ گەشتی ناو بەفر و بینینی دیمەنی سەرنجڕاکێش ڕوویان کردە دەرەوەی شارەکان، لەکاتی گەڕانەوەیان بووە هۆی دروستبوونی ئاستەنگیی هاتووچۆ لە چەندین شوێن.

ڕاگەیێنراوی فەرمی: ڕاگەیاندن و پەیوەندیەکانی دەروازەی نێودەوڵەتیی حاجی ئۆمەران بڵاوی کردەوە، لە لایەن دەروازەی(تەمەرچینی ئێران) ئاگادار کراوونەتەوە کە بەهیچ شێوەیەک هاتووچۆی گەشتیاری لە دیوی ئێران نەماوە و تەواوی  ڕێگاکان بەستراون. دەروازەكە داوا لە تەواوی گەشتیاران و هاووڵاتیانی هەرێمی کوردستان، عێراق و ئێران دەكات ئەگەر زۆر ناچار نەبن بۆ هاتووچۆ سەردانی دەروازەکە نەكەن.

 

لەلایەکی دیکە: هاوكات بەفر جموجۆڵی بازرگانی و گەشتیاری لە مەرزی کێلێ لە سنوری ئیدارەی ڕاپەڕین داخستووە، بەکر بایز قایمقامی قەزای پشدەر بە ئاڤای گوت، ئەمڕۆ دوای پاککردنەوەی ڕیگاکە بەهۆی چڕی بەفربارین لە سنورەکە دووبارە ڕێگای مەرزەکە داخرایەوە و هاتووچۆ وەستا.

 

- تیمەکان ڕێگاکانی سونێ، ‌هێرۆ و کێلی پاک دەکەنەوە و داوا لە هاووڵاتییان دەکەم ئەمشەو ڕێگاکانی سنوورەکە بەکار نەهێنن و نەیەنە دەرەوە چونکە زۆربەی ڕێگاکان بە بەفر داپۆشراوە و مەترسیدارە.

زانیاریی زیاتر: شنوار سادق، بەرپرسی هۆبەی پەیوەندییەکان و ڕاگەیاندنی دەروازەی سەرزێرێ لە سنوری دهۆک بە ئاڤای گوت، بەهۆی بارینی 75 سانتیمەتر بەفر هاتن و چوون بەتەواوی لە مەرزەکەدا وەستاوە.

ئەمەش بزانە: بەپێی زانیارییەکانی ئاڤا لە مەرزی نێودەوڵەتیی ئیبراهیم خەلیل، هاتن و چوونی بازرگانی و گەشتیاری ئاساییە و بەردەوامە.