کەشناسی بۆ هاونیشتمانیان: سبەی شەختە و بەستەڵەک دروست دەبێت و ئاگادار بن

ئاڤا نیوز

 

کەشناسیی هەرێمی کوردستان هۆشداری دەدات ئەمشەو کاتەکانی بەیانیی سبەی سێشەممە، شەپۆلێکی سەرمای بەهێز ناوچەکە دەگرێتەوە و پلەکانی گەرما بۆ خوار سفری سیلیزی دادەبەزن.

 

ڕاگەیێنراوی فەرمی: بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، لە ڕاگەیەنراوێکدا وردەکاریی دۆخی کەشوهەوای ئەمشەو و سبەی سێشەممەی بڵاو کردەوە و هۆشداری لە دابەزینی بەرچاوی پلەکانی گەرما دەدات.

 

لێدوانی فەرمی: شێخ دارا، شارەزا و پێشکەشکاری کەشوهەوای ئاڤا ڕایگەیاند، ئەم شەپۆلە بەفربارینە تاوەکوو سبەی بەردەوام دەبێت سبەی بای سارد هەڵدەکات ئاسمانیش هەوردەبێت، لە پارێزگای دهۆک تا ڕۆژی هەینی ئەم هەفتەیە بەفر بارین بەردەوام دەبێت، لە سلێمانی ئەمشەو 15 سانتیمەتر بەفر دەبارێت، لە دەوربەری کەرکووکیش بەفر دەبارێت، ئەمشەو ئەگەری هەیە لە گەرمیانش بەفر ببارێت.

زانیاریی زیاتر: بەپێی پێشبینییەکانی کەشناسی، کاریگەریی ئەو شەپۆلە بەفربارینەی ڕووی لە ناوچەکە کردووە، ئەمشەو بەرەو لاوازی دەچێت. تەنها لە ناوچە شاخاوییەکان کاریگەرییەکەی بەشێوەی بەفربارینی پچڕپچڕ و کرێوە دەمێنێتەوە. بۆ سبەی سێشەممە، کاریگەریی شەپۆلەکە بەتەواوی نامێنێت و ئاسمان ساماڵ دەبێت، بەڵام نزمبوونەوەی پلەکانی گەرما بەردەوام دەبێت.

 

بەگوێرەی ڕاگەیێنراوی بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان پلەکانی گەرما بەمشێوەیە دەبن:

 

• سەنتەری پارێزگای هەولێر: پلەی گەرما لە سفری سیلیزی نزیک دەبێتەوە.

• سەنتەری پارێزگاکانی سلێمانی، دهۆک و هەڵەبجە: پلەی گەرما بۆ ژێر سفری سیلیزی دادەبەزێت.

• ئیدارە سەربەخۆکانی سۆران و ڕاپەڕین: پلەی گەرما بۆ 3 پلە لەژێر سفری سیلیزی (-3) دادەبەزێت.

• ناوچە شاخاوییەکان: پلەی گەرما بۆ 6 پلە لەژێر سفری سیلیزی (-6) دادەبەزێت.

زانیاریی زیاتر: بەهۆی دابەزینی پلەکانی گەرماوە، دیاردەی شەختە و بەستەڵەک دروست دەبێت، بۆیە داوا لە هاووڵاتییان و شۆفێران دەکرێت وێڕای خۆپارێزی لە سەرما، ئاگاداری دۆخی ڕێگەوبانەکان بن.