لە دەیان ڕێگەی سەرەکی ئاستەنگیی هاتووچۆ دروست بووە و داوای بەهانەوە چوون دەکرێت

ئاڤا نیوز

 

بەهۆی بارینی بەفر، ئاستەنگیی هاتووچۆ لە چەندین ناوچەی هەرێمی کوردستان دروستبووە، هاووڵاتیان لە ڕێگەی ئاڤا میدیاوە داوای بەهاناوەچوون دەکەن.

 
وێنە گەورەکە: جیاواز لە ڕۆژانی ڕابردووی بارانبارین، ئێوارەی ئەمڕۆ دووشەممە 29-12-2025 شەپۆڵێکی بەفربارین زۆربەی ناوچەکانی هەرێمی کوردستان گرتەوە، ژمارەیەکی زۆری هاووڵاتیان بۆ گەشتی ناو بەفر و بینینی دیمەنی سەرنجڕاکێش ڕوویان کردە دەرەوەی شارەکان، لەکاتی گەڕانەوەیان بووە هۆی دروستبوونی ئاستەنگیی هاتووچۆ لە چەندین شوێن.

 
ڕاگەیێنراوی فەرمی: بەڕێوەبەرایەتیی چاککردنەوە و پاراستنی ڕێگاوبانی ھەولێر هۆشداری دەدات لە تەواوی سنووری پارێزگای هەولێر، بەهۆی ئەم شەپۆڵە چڕەی بەفربارین و دابەزینی پلەکانی گەرما بۆ ئاستی زۆر نزم، ڕێگاکان دەبنە بەستەڵەک و شەختە، سەرەڕای ڕژاندنی خوێ لە ڕێگاکان، بەڵام هاتووچۆ بۆ ئۆتۆمبێلەکان ئەستەمە و داوا لە هاونیشتمانیان دەکات "تا دەتوانن لە ڕێگا شاخاوییەکان نزیک مەکەونەوە"، دڵنیاییش دەدات کە تیمەکان بەردەوام دەبن لە ڕاماڵین و ئێشکگر دەبن. 

 

لەلایەکی دیکەوە: قایمقامیەتی قەزای چۆمان هۆشداریی دەدات بەهیچ شێوەیەک هاووڵاتیان بەمەبەستیی کاتبەسەربردن "ڕوونەکەنە سنووری چۆمان و حاجی ئۆمەران و ئەو شوێنانەی کە ناتوانین بە ئاسانی فریایان بکەوین"، بەهۆی چڕی بەفربارین و مەترسیی بەستەڵەکی ڕێگاکان، ژیانیان دەکەوێتە مەترسی، بەهۆکاری کەمیی تیمەکانی بەهاناوەچوون، "ناتوانین بە ئاسانی فریایان بکەوین".

 

زانیاریی زیاتر: بەشێک لەو هاووڵاتیانەی کە بۆ بینینی دیمەنەکانی بەفربارین ڕوویان لەناوچە گەشتیارییەکان کردبوو، لەکاتی گەڕانەوەیان دووچاری ئاستەنگیی هاتووچۆ بوون و لەناو ئۆتۆمبێلەکانیان لە چاوەڕوانی کردنەوەی ڕێگاکانن، لە زۆربەی ئەو شوێنانە پەیوەندی بە ئاڤا میدیا دەکەن دەنگیان بگەیێنن و لایەنی پەیوەندیدار هەوڵ بدات ڕێگاکان بکەنەوە.

ئەم ڕێگایانەی خوارەوە ئاستەنگیی هاتووچۆی لێ دروستبووە:

-    ڕێگای سەرەكی پیرمام – هەولێر 
-    ڕێگای هەولێر – گۆمەسپان
-    ڕێگای گۆمەسپان - دێگەڵە
-    ڕێگاکانی شەقڵاوە و دەوروبەری
-    ڕێگای چیای سەفین 
-    ڕێگاکانی سۆران و دەوروبەری، سەربەرد بۆ سیدەکان، بێخاڵ، ڕواندز
-    سنوری چۆمان و حاجی ئۆمەران
-    دۆڵی مەلەکان
-    بەشێکی زۆری ناوچە شاخاوییەکانی سنووری هەموو پارێزگاکان
-    لۆفەکانی سپیلک
-    زینی وەرتێ و ئیدارەی ڕاپەڕین
-    ڕێگای بەشێکی زۆری گوندەکانی ناوچەی پشدەر
-    ڕێگای هاتن و چوونی نێوان ڕانیە بۆ قەلادزێ و ناحیەکانی سەنگەسەر و ژاراوە
-    ڕێگای نێوان ڕانیە، ناحیەی بنگرد و گوندەکان
-    ڕێگای چیای ماکۆک لە سنووری ڕاپەڕین
-    بناری قەندیل – کورتەک