زیاتر لە 13 ساڵە بڕیاری دروستكردنی دوو نەخۆشخانە لە دەڤەری شنگال دراوە و تا ئێستا جێبەجێ نەكراوە

ئاڤا نیوز

بڕیارە لە داهاتووێكی نزیكدا بەردی بناغەی دوو نەخۆشخانەی 100 قەرەوێڵەیی و 50 قەرەوێڵەیی لە دەڤەری شنگال دابنرێن كە زیاتر لە 13 ساڵە بڕیاریان لەسەر دراوە.

وێنە گەورەكە: دەڤەری شنگال كە دەكەوێتە سنووری ناوچە كوردستانییەكانی دەرەوەی ئیدارەی هەرێمی کوردستان، بەهۆی ناكۆكی سیاسی و ئەو گۆڕانكارییە سەربازی و ئەمنییانەی لە ساڵانی ڕابردوو بەسەری هاتووە، دانیشتووانەكەی بەتەواوی لە پرۆژە خزمەتگوزارییەكان بێ بەش كراون، جگە لەوەش بەهۆی بوونی هێزی چەكداری لە یاسابەدەر، تا ئێستاش هەزاران ئاوارەی ئێزدی ناتوانن بگەڕێنەوە زێدی خۆیان.

بڵاکراوەی فەرمی: د. خەلەف شنگالی، ڕاوێژكاری سەرۆكوەزیرانی عێراق بۆ كاروباری ئێزدییەكان، ڕایگەیاند، سەرجەم ڕەزامەندییەكان بۆ بونیادنانی نەخۆشخانەیەكی 100 قەرەوێڵەیی لە سەنتەری قەزای شنگال و نەخۆشخانەیەكی تری 50 قەرەوێڵەیی لە سنوونێ، تەواوكراون و پرۆژەكان ئێستا لە قۆناغی تەندەردایە و لە ئاییندەیەكی نزیكدا بەردی بناغەی هەردوو پرۆژەكە دادەنرێن.

ئاماژەی بەوەشكرد، دروستكردنی هەردوو نەخۆشخانەكە بە نووسراوی فەرمیی سەرۆكایەتیی ئەنجوومەنی وەزیرانی فیدراڵ لەسەر گوژمەی تەرخانكراو بۆ وەزارەتی تەندروستیی عێراق جێبەجێ دەكرێت و تەرخانی دارایشی بۆ كراوە.

بۆچی گرنگە: بە تەواوبوونی هەردوو نەخۆشخانەكە، خزمەتێكی زۆری سێكتەری تەندروستیی دەڤەرەكە دەكات كە ماوەیەكی زۆرە دەڤەری شنگال لە جێبەجێكردنی پرۆژە خزمەتگوزارییەكان بێ بەش كراوە و بەهۆكاری جۆراوجۆر فەرامۆش كراوە.

زانیاریی زیاتر: پرۆژەی دروستكردنی نەخۆشخانەی گشتیی شنگال، لەوەتەی ساڵی 2012ـەوە بڕیاری لەسەردراوە، بەڵام بە بیانوو و هۆكاری جۆراوجۆر جێبەجێكردنی وەستێنراوە.