ژمارەیەک کۆچبەری دیکەی کورد لە لیبیا دەگەڕێنەوە هەرێمی کوردستان

ئاڤا نیوز

ئاڤا وادەی گەڕانەوەی ژمارەیەک کۆچبەری کورد ئاشکرا دەکات کە ماوەیەکە لە لیبیا دەستگیر کراون و ئەمشەو دەگەنەوە فڕۆکەخانەی نێودەوڵەتی هەولێر.

وێنە گەورەکە: لە ساڵی ڕابردوو لیبیا بووە بە یەکێک لە ڕێڕەوە دیارەکانی گەیشتن بە وڵاتانی ئەوروپا بە ڕێگەی نایاسایی. بەشێک لە گەنجانی هەرێمی کوردستان و وڵاتانی دیکەی ناوچەکە، بۆ گەیشتن بە کەناراوەکانی ئیتاڵیا ڕێگای ئەو وڵاتە بەکاردەهێنن. بەشی هەرە زۆری گەنجەکان لەلایەن هێزە ئەمنییەکانەوە دەستگیر دەکرێن و ڕووبەڕووی دۆخی نەخوازراو و ئەشکەنجەدان و گیانلەدەستدان دەبنەوە.

زانیاریی بەدەستهاتوو: ئاڤا  لە سەرچاوەیەکی ئاگادار لە دۆسیەی هێنانەوەی دەستگیرکراوان ئەوەی زانیوە، کاتژمێر 11:20 خولەکی ئەمشەو، ژمارەیەک کۆچبەری کورد لە فڕۆکەخانەی بەنغازییەوە بەرەو فڕۆکەخانەی نێودەوڵەتیی هەولێر بەڕێدەکەون، بەپێی بلیتەکانیان بێت، فڕۆکەکەیان کاتژمێر 02:45 خولەک لە هەولێر دەنیشێتەوە.

ئەوەی پێویستە بیزانیت: ئەو کۆچبەرانە ماوەیەکە لە بەنغازیی لیبیا دەستگیر کراون، لە ڕۆژانی ڕابردوو بلیتی گەڕانەوەیان کڕیوە و دەگەڕێنەوە، بەشی هەرە زۆریشیان خەڵکی سنووری ڕاپەڕینن.

ژمارەکان وادەڵێن: ئاڤا زانیویەتی لەماوەی کەمتر لە دوو مانگی ڕابردوودا 102 کەس لە لیبیاوە گەڕێنراونەتەوە هەرێمی کوردستان، لەو ژمارەیە 101 کەسیان دانیشتووی دەڤەری ڕاپەڕین بوون، تەنیا یەک کەسیان دانیشتووی هەولێر بووە.