تۆڕی زاگرۆسانە هەزاران بەڕوو لە چیاکانی کوردستان دەڕوێنێت

ئاڤا نیوز

بۆ ماوەی چوار هەفتە و لە ڕۆژانی هەینی، ئەندامانی تیمی "تۆڕی زاگرۆسانە" لەسەر ئاستی هەر چوار پارچەی کوردستان هەڵمەتی چاندنی بەڕوویان لە زنجیرە چیاکانی زاگرۆس دەستپێکرد.

وێنە گەورەکە: داری بەڕوو هێمایەکی دیاری چیاکانی کوردستانە، لەماوەی ساڵانی ڕابردوو چەندین گرووپ و تیم لە هەوڵی چاندنی داری بەڕوون لە ناوچە جیاوازەکان. ئەمەش لە پێناو سەوزترکردنی چیاکانی کوردستان.

لێدوانی فەرمی: سەردەشت محەممەد، ئەندامی ڕێکخەری تۆڕی زاگرۆسانە بە ئاڤای گوت، ئەمڕۆ کۆتا هەفتەی هەڵمەتەکە بوو. ئامانجمان لەو کارە ژیانەوەى سرووشتى کوردستانە لە زنجیرەچیاکانی زاگرۆس و بە کولتوورکردنی چاندنی بەکۆمەڵ و تاکە لە سرووشتی کوردستاندا، ڕۆژانی هەینی لە ڕێگەی گرووپە خۆبەخشە جیاوازەکان لەیەک کاتدا لەهەر چوار بەشەکەی باکوور، باشوور، ڕۆژئاوا و ڕۆژهەڵاتی کوردستان، دەیان هەزار تۆوی بەڕوو دەچێنین.

سەردار محەممەد، گوتیشی: لەم هەڵمەتەدا دەیان هەزار تۆوی بەڕوومان چاندووە و پلانی پێشکەوتوومان هەیە بۆ ساڵانی ئایندە بەردەوام دەبین و هەڵمەتی چاندنی بەڕوو لە چیاکانی کوردستان فراوان دەکەین.

زانیاریی زیاتر: لە هەفتەی کۆتایدا، ئەمڕۆ تەنیا لە سنووری پارێزگای سلێمانی لە ناوچەکانی زنجیرەچیاى بەرانان، بنارى بەمۆ، پیرەمەگروون، سەرگەڵوو، هەورامان، بیارە، قەڵادزێ، سەیدسادق و دۆڵى جافایەتى لە لایەن دەیان خۆبەخش و ژینگەپارێز و ژینگەدۆست، هەزاران تۆوی بەڕوو چێنراوە.

ئەوەی پێویستە بیزانیت: تۆڕی زاگرۆسانە تۆڕێکی خۆڕسکانەیە، ساڵانە چوارهەفتە لەسەر ئاستی هەر چوار پارچەی کوردستان ڕۆژانی هەینی هەڵمەتی چاندنی بەڕوو لە زنجیرە چیاکانی زاگرۆس دەستپێدەکەن، ماوەی حەوت ساڵە ئەو کارە دەکەن.