لە دوو ڕۆژدا 40 تۆن پاشماوەی زیانبەخش لە ڕووباری سیروان دەردەهێنرێت

ئاڤا نیوز

هۆبەی ژینگە و خزمەتگوزاری لە بەڕێوەبەرایەتیی گشتیی شارەوانییەكانی هەڵەبجە ڕایدەگەیێنێت، نزیكەی 40 تۆن پاشماوەی زیانبەخش، لە ڕووباری سیروان دەرهێنراوە كە بەهۆی باران و لافاوەكەی هەفتەی ڕابردوو، تێكەڵ بە ئاوی ڕووبارەكە بووە.

چیرۆكی سەرەكی: ماوەی دوو ڕۆژە، تیمێكی هاوبەش كە پێكهاتوون لە كارمەندانی بەڕێوەبەرایەتیی گشتیی شارەوانییەکانی هەڵەبجە، پارێزگای هەڵەبجە، تیمی وەڵامدانەوەی خێرای مرۆیی پارێزگاكە هەڵەبجە ( RRU )، سەرۆکایەتیی شارەوانیی سیروان و تیمی کۆمپانیای (بیڤان)،  بە چڕی کار لەسەر کۆکردنەوە و لابردنی سەرجەم پاشماوە زیانبەخشەکانی نێو ڕووباری سیروان دەکەن و پرۆسەی خاوێنكردنەوەی ڕووبارەكە بەردەوامە.

زانیاریی بەدەستهاتوو: بەشی ڕاگەیاندنی شارەوانییەكانی هەڵەبجە بە ئاڤای ڕاگەیاند، بەپێی ئامارێکی هۆبەی ژینگە و خزمەتگوزاری سەر بە بەڕێوەبەرایەتییەكەمان، تەنیا لەماوەی دوو ڕۆژدا نزیکەی 40 تۆن پاشماوەی زیانبەخش لە ڕووباری سیروان کۆکراوەتەوە.

بەڕێوەبەرایەتیی گشتیی شارەوانییەكانی هەڵەبجە دووپاتیشی دەكاتەوە، لە کۆکردنەوە و لابردنی هەموو پاشماوە پلاستیکی و زیانبەخشەكانی دیكە بەردەوام دەبن كە بەهۆی باران و لافاوی هەفتەی ڕابردوو تێكەڵ بە ئاوی ڕووبارەكە بووە.