وردەکاریی نوێ لەبارەی ژیانی ئەسەد لە مۆسکۆ بڵاو دەکرێتەوە

ئاڤا نیوز

ڕۆژنامەیەکی ئەمریکی زانیاریی نوێ لەبارەی شوێنی مانەوەی بەشار ئەسەد و خێزانەکەی لە مۆسکۆ بڵاودەکاتەوە و دەڵێت: ئەسەد و خێزانەکەی لە ڤێلایەک لە ڕۆژئاوای مۆسکۆی پایتەختی ڕووسیا دەژین و جگە لە بەهێزی ئاسایشی ئەو شوێنەی تێیدان کە تایبەتە بە خەڵکی دەستەبژێر، هێزە ئەمنییەکانی ڕووسیاش بەتایبەتی چاودێرییان دەکەن و دەیانپارێزن.

وێنە گەورەکە: زیاتر لە ساڵێکە بەشار ئەسەد سەرۆکی هەڵاتووی سووریا لە دەسەڵاتدا نەماوە، بەڵام بەهۆی ئەوەی لەو کاتەوە هیچ وێنە و زانیارییەک لەبارەی ژیانی خۆیی و خێزانەکە بە فەرمی بڵاونەکراوەتەوە، بۆیە ناوەناوە میدیا جیهانییەکان زانیاریی لەبارەیانەوە بڵاودەکەنەوە و دەبنەوە باس و خواسی تۆڕە کۆمەڵایەتییەکان.

زانیاریی بەدەستهاتوو: ڕۆژنامەی نیویۆرک تایمزی ئەمریکی پاڵپشت بە سەرچاوە ئاگادارەکان، ئەنجامی بەدواداچوونێکی بڵاوکردووەتەوە و ئاماژەی بەوەداوە، ئەسەد و خێزانەکەی لە مۆسکۆ لە ژیانێکی شاهانەییدا دەژین، هەر لەسەرەتاوە کە گەیشتوونەتە شارەکە لە شوققەیەکی شاهانەیی سەر بە هۆتێلی فۆرسیزندا ماونەتەوە کە خەرجی مانەوەی یەک هەفتە تێیدا 13 هەزار دۆلار بووە.

باسی لەوەشكردووە، بەڵام دواتر بۆ شوققەیەکی دیکەی پێنتهاوسی دوو نهۆمی لە فێدرەیشن تاوەر گوازراونەتەوە، ئەم تاوارە چێشتخایەکی بەناوبانگی تێدایە کە چێشتخانەی دڵخوازی ئەسەدەو پێشتر هەردەم سەردانی کردووە.

هەر بەگوێرەی ڕۆژنامەکە، دواتر ئەسەد و خێزانەکەی بۆ ڤێلایەک لە ناوچەی کۆمپاوند ڕۆبلۆکۆ لە ڕۆژئاوای مۆسکۆ گوازراونەتەوە، ئەم ناوچەیە بە پشتێنەیەکی ئەمنیی تایبەت لە بەشەکانی دیکەی شارەکە جیاکراوەتەوە و تایبەتە بە خەڵکی دەستەبژێر، سەرەڕای ئەوەش هێزە ئەمنییەکانی ڕووسیا بەتایبەتی چاودێری ئەسەد و خێزانەکەی لەو کۆمەڵگەی نیشتەجێبوونە تایبەتە دەکەن.

ئەوەی پێویستە بیزانیت: سەرەڕای ئەو ئاسایشە بەهێز و پتەوەی هەیانە، بەڵام دەسەڵاتدارانی ڕووسیا هەموو جۆرە لێدوان، پەیام، وێنە، ڤیدیۆ و چاوپێککەوتنێکیان لە ئەسەد و ئەندامانی دیکەی خێزانەکەی قەدەغە کردووە، بەهۆی ئەوەی ئەوان مافی مانەوەی مرۆییان پێدراوە و نابێت دەرکەوتن و پەیامی سیاسییان هەبێت.