ڕۆژئاوای کوردستان بودجەی 2026ـی پەسەند کرد: نزیکەی 1.6 ملیار دۆلارە بە کورتهێنانەوە

ئاڤا نیوز

 

دەستەی دارایی هەرێمی باکوور و ڕۆژهەڵاتی سووریا ڕایگەیاند، بودجەی ساڵی داهاتووی هەرێمەکەیان ملیارێک و 577 ملیۆن دۆلارە، بەهۆی زۆریی خەرجییەکانیش بەراورد بە داهات 213 ملیۆن دۆلار کورتهێنانیان هەیە.

 

وێنە گەورەکە: ڕۆژی 22ی ئەم مانگە ئەنجوومەنی یاسادانان لە هەرێمی باکوور و ڕۆژهەڵاتی سووریا یاسای بودجەی ساڵی 2026ی پەسەندکرد، یاساکەش لە 1-1-2026ەوە دەچێتە باری جێبەجێکردنەوە، تیایدا جگە لە مووچەی هێزە ئەمنییەکان و فەرمانبەرانی شارستانی، زیاتر بودجە بۆ پڕۆژەکانی ژێرخان، پەروردە، تەندروستی و وزە تەرخانکراوە.

 

لێدوانی فەرمی: ئەحمەد یوسف، هاوسەرۆکی دەستەی دارایی ئیدارەی خۆسەر، ئەمڕۆ پێنجشەممە، بە میدیاكانی ڕۆژئاوای کوردستانی ڕاگەیاند، بودجەی ساڵی داهاتووی هەرێمەکەیان بە ملیارێک و 577 ملیۆن و 392 دۆلار و کورتهێنانیش بە 213 ملیۆن و 750 دۆلار خەمڵێنراوە، 75%ـی داهاتیش لە کەرتی نەوت، 10% لە گومرگ ، 3% لە باج و ڕێژەکانی دیکە لە داهاتی وەک کارەبا، ئاو و داهاتی فەرمانگە دادییەکان دەستدەکەوێت.

 

هەنگاوی داهاتوو: وتیشی، بۆ پڕکردنەوەی کورتهێنان پەنا بۆ زیادکردنی باج نابەن، بەڵام هەوڵی باشترکردنی کۆکردنەوەی باج و کەمکردنەوەی خەرجییەکان دەدەن، کاری لەپێشینەشیان کۆنتڕۆڵکردنی هەڵاوسان و باشترکردنی توانای هاووڵاتیانە بۆ کڕینی پێداویستییەکانیان.