عامر فایز: بە دووری دەزانم لە یەکەم دانیشتن سەرۆکایەتی پەرلەمان هەڵبژێردرێت

ئاڤا نیوز

 

سەرۆکی هاوپەیمانیی تەسمیم و سەرۆکی بەتەمەنی یەکەم دانیشتنی پەرلەمان ڕایدەگەیێنێت، ئامادەکارییەکان بۆ یەکەم دانیشتنی پەرلەمانی عێراق دەستیان پێکردووە، بەڵام مەترسی ئەوە هەیە لە کۆبوونەوەکەدا سەرۆکی نوێی پەرلەمان هەڵنەبژێردرێت.

 

وێنە گەورەکە: سەرەڕای دیاریکردنی رۆژی دووشەممەی داهاتوو، 29ـی ئەم مانگە بۆ یەکەم دانیشتنی خولی شەشەمی پەرلەمان و هەڵبژاردنی سەرۆکایەتیی پەرلەمان و هۆشدارییەکانی دادگا لەو بارەیەوە، بەڵام ترسی لە پێشێلکاریی دەستووریی هەیە.

 

لێدوانی فەرمی: عامر فایز، سەرۆکی هاوپەیمانیی تەسمیم و سەرۆکی بەتەمەنی یەکەم دانیشتنی پەرلەمان ڕایگەیاند، سەرۆکی ئەنجوومەنی باڵای دادوەریی عێراق دووپاتی کردووەتەوە کە "هێشتنەوەی یەکەم دانیشتن بە کراوەیی، داهێنانێکی نادروستی یاساییە". ناوبراو داوای کرد کە پێش 29ـی ئەم مانگە، لەسەر ناوی سەرۆکی پەرلەمان و هەردوو جێگرەکەی ڕێکبکەون.

 

ئەوەی پێشبینی دەکرێت: فایز ئاماژەی بەوەش کرد کە "چاوەڕوان ناکات لە دانیشتنی یەکەمدا دەستەی سەرۆکایەتی تێپەڕێنرێت"، هەروەها هیوای خواست کە کارەکە بەرەو پێشێلکاریی دەستووری نەڕوات".

 

لەهەمان کاتدا: فایز ئاماژەی بەوەدا کە ئەحمەد ئەسەدی و موحسین مەندەلاوی خۆیان بۆ پۆستی جێگری یەکەمی سەرۆکی پەرلەمان کاندید کردووە و چوارچێوەی هەماهەنگی کۆبوونەوەیەکی داهاتووی دەبێت بۆ یەکلاییکردنەوەی ئەم پرسە، کە ڕەنگە تێیدا کاندیدی سەرۆکوەزیرانیش ڕابگەیێنرێت.

 

ئەوەی پێویستە بیزانیت: پێشتر فایەق زێدان، سەرۆکی ئەنجوومەنی باڵای دادوەری هۆشداری لەوەدابوو کە پێویستە لە یەکەم دانیشتن سەرۆکایەتی پەرلەمان هەڵبژێردرێت و نابێت دانیشتنەکە بە کراوەیی بمێنێتەوە.