لە دیالە تۆمەتبارێک لە زیندان ڕادەکات و دوای کەمتر لە 24 کاتژمێر دەستگیر کرایەوە

ئاڤا نیوز

تۆمەتبارێک لە زیندانێکی دیالە ڕادەکات، بەڵام دوای کەمتر لە 24 کاتژمێر لەلایەن پۆلیسەوە دووبارە دەستگیر دەکرێتەوە، منداڵێک لە ڕێگەی گرتە ڤیدیۆیەک شوێنەکەی بۆ پۆلیس ئاشکرا دەکات و ئێستا مەترسی لەسەر ژیانی منداڵەکە دروست بووە.

چیرۆکی سەرەکی: تۆمەتبارێک لە دیالە کە بە تۆمەتی کوشتنی سێ ئەندامی خێزانەکەی دەستگیرکرابوو، توانیویەتی لە زیندان ڕابکات، بەڵام دوای کەمتر لە 24 کاتژمێر دەستگیرکرایەوە، ناوی هومام مستەفا عوبەیدییە ماوەی سێ مانگە بە تۆمەتی کوشتنی باوک، دایک و برایەکی دەستگیرکراوە.

چی ڕوویدا: شەوی 6ـی ئەم مانگە لە نێوان کاتژمێر نۆ بۆ 10ـی شەو لە کاتی گۆڕینی شەفتی پاسەوانەکان لە بینای فەرماندەیی پۆلیسی دیالە تۆمەتبارێک بەرەو شوێنێکی نادیار هەڵاتووە. پێشتر وا بڵاوکرابووەوە کە تووشی ئایدز بووە، هەر بۆیە بۆ خۆپارێزی لە زیندانێکی تاکەکەسی دانراوە. تۆمەتبارەکە سوودی لەو دەرفەتە بینیوە و لە شوێنی هەواگۆڕکێی زیندانەکەوە ڕایکردووە.

زانیاریی زیاتر: بەهۆی ئەم ڕووداوەوە، حەوت ئەندامی هێزە ئەمنییەکان لەلایەن لیژنەی لێکۆڵینەوەوە ڕاگیراون، چونکە گومان دەکرێت چیرۆکی تووشبوونی بە ڤایرۆسی ئایدز پلان بۆ داڕێژراو بووبێت بۆ ئەوەی بخرێتە زیندانی تاکەکەسی و ڕێگەی هەڵاتنی بۆ ئاسان بێت.

دوای هەڵهاتنی  هێزە ئەمنییەکان لە قەزای بەعقوبە کەوتنە حاڵەتی ئامادەباشییەوە. لەو کاتەدا مێردمنداڵێک بەناوی ئیبراهیم باسم گرتەیەکی ڤیدیۆیی لە تۆڕە کۆمەڵایەتییەکان بڵاوکردەوە و هێزە ئەمنییەکانی ئاگادارکردەوە کە تۆمەتبارەکە بەرەو باخەکانی ناوچەی شفتە ڕۆیشتووە کە دەکەوێتە پشتی گرتووخانەکە. هێزە ئەمنییەکان دەستبەجێ گەمارۆی ناوچەکەیان دا و لەناو خانوویەکی  هەیکەل تۆمەتبارەکەیان دەستگیرکردەوە.

مەترسییە پێشبینیکراوەکان: بڵاوبوونەوەی ئەو گرتە ڤیدیۆییە لەلایەن ئەو مێردمنداڵەوە، خێزانەکەی دووچاری ترس و دڵەڕاوکێ کردووە لەوەی تووشی کێشەی عەشایەری ببنەوە