وەزارەتی کارەبا: لەم مانگە بەهۆی زۆر بەکارهێنانی کارەبا هاوبەشان پارەی زۆریان بۆ هاتووەتەوە

ئاڤا نیوز

وەزارەتی کارەبا هاوبەشانی ئاگادار دەکاتەوە. نرخی کارەبا هەمان نرخی جارانە و بەرز نەکراوەتەوە. لەبارەی کرێی کارەباوە دەڵێت، لەمانگی یەک بەهۆی سەرما و زۆر بەکارهێنانی کارەبا لەلایەن هابەشانەوە پارەی زیاتریان بۆ هاتووەتەوە.

چیرۆکی سەرەکی: چەند ڕۆژێکە هاوبەشانی کارەبا گلەیی دەکەن و دەڵێن دەستکاری سیستەمی نرخی پڕۆژەی ڕووناکی کراوە، لە سۆشیاڵ میدیا پسوولەی زۆر بڵاودەکەنەوە، جیاوازی هەیە لە نرخ، بۆ نموونە دوو پسوولە بڵاودەکەنەوە یەکێکیان هی مانگی یەکە و یەکێکیان هی مانگێکی پێشتر، هەمان بڕی کارەبایان بەکارهێناوە بەڵام نرخەکەی جیاوازە یان دوو بەرامبەرە.

ڕوونکردنەوەی فەرمی: وەزارەتی کارەبا ڕوونکردنەوەیەکی بڵاوکردەوە و ڕایگەیاند، "هاوبەشانی کارەبا ئاگادار دەکەینەوە نرخی کارەبا هەمان نرخە کە بە ڕێگەی یاسایی پەسەندکراوە و لە ڕۆژنامەی وەقائعی کوردستان بڵاو کراوەتەوە، نرخەکانیش دیاریکراوە بۆ یەک مانگ هەژمار دەکرێت".

٠ پێدانی كرێی کارەبا بە ڕێگەی ئۆنلاین، هەنگاوێکی شارستانی و پێشکەوتوو و شەفافە، ئاسانکاریشە بۆ هاووڵاتیان بۆ ئەوەی بتوانن بە بێ سەردانیکردنی فەرمانگەکانی کارەبا کرێی کارەباکەیان بدەن".

٠ لە مانگی یەک بەهۆی شەپۆلی سەرما و دابەزینی پلەکانی گەرما زۆرێک لە هاوبەشان بڕی کارەبای زیادیان بەکارهێناوە، بۆیە کرێی کارەبای زیاتر بۆیان هاتووەتەوە، ئەگەر هەر گرفتێکیش بۆ هەر هاوبەشێک دروست بووبێت، ئەوا لە فەرمانگەکانی فرۆشتنی کارەبا، تیمی تایبەت چارەسەری گرفتەکە دەکەن.