هاوپەیمانی ئیدارەی دەوڵەت کۆبووەوە؛ باسی سەرۆککۆمار و سەرۆکوەزیران نەکرا

ئاڤا نیوز

ئەمشەو لایەنەکانی ناو هاوپەیمانی ئیدارەی دەوڵەت (لایەنە پێکهێنەرەکانی حکومەتی عێراق) لە بەغدا کۆبوونەوە، لە کۆبوونەوەکەدا باسی پرسەکانی سەرۆککۆمار و سەرۆکوەزیران نەکرا، بەڵام داواکرا لایەنەکان خۆیان لە هەموو لێدوانێک بەدووربگرن کە لە بەرژەوەندی دۆخی عێراقدا نەبێت.

چیرۆکی سەرەکی: بە بەشداری محەممەد شیاع سوودانی سەرۆکوەزیران، لەتیف ڕەشید سەرۆککۆمار، هەیبەت حەلبوسی سەرۆکی پەرلەمان و سەرۆک و سەرکردەی لایەنە کوردی، شیعیی و سونییەکان، ئەمشەو لایەنەکانی ناو هاوپەیمانی ئیدارەی دەوڵەت لە بەغدا کۆبوونەوە.

زانیاریی زیاتر: لە کۆبوونەوەکەدا پرسی یەکلاییکردنەوەی سەرۆککۆمار و سەرۆکوەزیران باس نەکرا و تەنیا داوا لە لایەنەکان کرا خۆیان لە وتار و ڕەفتاری تووند بە دوور بگرن کە خزمەتی عێراق ناکات.

ڕاگەیێنراوی فەرمی: نووسینگەی سەرۆکوەزیرانی عێراق بڵاویکردەوە، لە کۆبوونەوەکەدا پێشوازی لە گفتوگۆکانی نێوان ئەمریکا و ئێران کرا و داواکرا زمانی گفتوگۆ بکرێتە بنەما بۆ چارەسەری کێشەکان، ناوچەکەش لە گرژی، قەیرانی مرۆیی و ئابووری دووربخرێتەوە، لەم بوارەشدا سوپاسی هەوڵەکانی وڵاتانی عەرەبی کرا و ئەو هەڕەشانەش ڕەت کرایەوە کە لە ئێران دەکرێن، چونکە لەگەڵ بنەما نێودەوڵەتییەکان یەکناگرێتەوە.

هاوپەیمانی ئیدارەی دەوڵەت داوای کۆنترۆڵکردنی هەموو لێدوان و ڕەفتارێکیشی کرد کە لەگەڵ بەرژەوەندییەکانی عێراق یەکناگرێتەوە، لە بواری کاروباری حکومەتیشدا پشتیوانی خۆیان بۆ ڕێکارەکانی حکومەت و چاکسازییە ئابوورییەکان دەربڕی، بەتایبەتیش ئەو بڕیارانەی کە دەبنە هۆی زیاتر کۆنترۆڵکردنی سنوورەکان و سنووردانان بۆ قاچاخچێتی و خۆدزینەوە لە باج و گومرگ، پشتیوانی خۆیشیان بۆ فرەجۆرکردنی سەرچاوەکانی داهات و پشتیوانی بەرهەمی ناوخۆیی دەربڕی.

لەلایەکی دیکەوە: لەبارەی پرسی زیندانییەکانی داعش، هاوپەیمانی ئیدارەی دەوڵەت پشتیوانی خۆی بۆ ڕێکارە دادوەرییەکان بەرامبەر ئەو زیندانییانە دەربڕی کە لە سووریاوە بۆ عێراق هێنراون، داواش لە کۆمەڵگەی نێودەوڵەتی کرا لەم بوارەدا بەرپرسیاریەتی هەڵبگرێت و زیندانیکراوەکانیان وەربگرنەوە و لە وڵاتی خۆیاندا سزایان بدەن.