خانمێکی قەزای پشدەر لە تەمەنی 60 ساڵیدا ماڵەکەی کردووەتە کارگەیەکی بچووکی ڕستن و چنین

ئاڤا نیوز

دادە فاتمە، ژنێکی تەمەن 60 ساڵی دانیشتووی ناحیەی ژاراوەیە، لە ڕێگەی کارە دەستییەکانییەوە بژێوی خێزانەکەی دابین دەکات و بووەتە نموونەیەک بۆ کۆڵنەدانی ژنان.

بەدواداچوونی ئاڤا: ماڵەکەی دادە فاتمە لە ناحیەی ژاراوەی قەزای پشدەر، وەک کارگەیەکی بچووکی لێ هاتووە؛ ئەو بە خوریی سرووشتی، ملپێچ، دەستکێش، گوێرەوی و لفکە دەچنێت. جیا لەوەش، میوەکان بە شێوەیەکی تەندروست وشک دەکاتەوە و دەیانفرۆشێت، کە بە گوتەی کڕیارەکانی، زۆر لە میوە هاوردەکان پاکتر و خۆشترن. 

٠ حەوشەی ماڵەکەی هەمیشە بۆنی مێخەک، میوەی وشکراوە و داودەرمانی کوردەواری لێ دێت. فاتمە ئەم پیشەیەی لە منداڵییەوە و بە دزی دایکییەوە فێر بووە و ئێستا کارەکانی لەو پێشانگایانەدا ساغ دەکاتەوە کە بۆ کارە دەستییەکان دەکرێنەوە.

لێدوانی فەرمی: دادە فاتمە لەبارەی کارەکەیەوە بە ئاڤای ڕاگەیاند: عاشقی ڕستن و چنینم؛ ئامانجم ئەوەیە دەست بۆ کەس پان نەکەمەوە و نانێکی حەڵاڵ بدەم بە منداڵەکانم. تەمەن ڕێگر نییە لەبەردەم کارکردن و داهێناندا.

زانیاریی زیاتر: پەیامنێری ئاڤا کە سەردانی ماڵی دادە فاتمەی کردووە، ئاماژە بەوە دەکات کە ئەم ژنە توانیویەتی کارە دەستییەکان بکاتە سەرچاوەی سەرەکیی دابینکردنی بژێوی خێزانەکەی.