کچێکی دەست ڕەنگین قارچکی ژاراوە دەگەیەنێتە بەغدا

ئاڤا نیوز

خانمێکی دەست ڕەنگین کە دەرچوویەکی کۆلێژی کشتوکاڵییە، لە ناحیەی ژاراوە ژوورێکی ماڵەکەی کردووەتە کارگەی بەرهەمهێنانی قارچک و ئێستا بەرهەمەکانی لە سەرانسەری کوردستان و عێراق کڕیاریان هەیە.

بەدواداچوونی ئاڤا: نزار محەممەد، دەرچووی کۆلێژی کشتووکاڵە؛ ئەو بەپێی ئەو زانستە لە زانکۆ بەدەستی هێناوە، ژوورێکی ماڵەکەیانی کردووە بە کارگەی بەرهەمهێنانی قارچک.

٠ ئێستا ئەو قارچکەی نزار بەرهەمی دەهێنێت، کوالێتییەکی زۆر باشی هەیە، جۆری "سەدەف"ـە و لە بازاڕیشدا گرانە؛ ئەو بەرهەمەکانی بۆ شارە گەورەکان دەنێرێت و هەندێک جار کڕیار لە بەغداوە بۆ قارچکەکانی دێت.

لێدوانی فەرمی: نزار محەممەد لەبارەی سەرەتای کارەکەی بە ئاڤای ڕاگەیاند: لە یەکەم هەنگاومدا تووشی زەرەر بووم، بەڵام هەر کۆڵم نەدا و بەردەوام بووم هەتا سەرکەوتم. یەکەمجاریش کە بینیم قارچکەکانم بەرهەم هاتوون، هەستێکی زۆر خۆشم هەبوو کە توانیم ئەنجامی ماندووبوونەکەم ببینم.

زانیاریی زیاتر: ئەو کچەی قەزای پشدەر چاوەڕێی دەستی کەسی نەکرد و بەو ئیمکانیەتە کەمەی لە ناو ماڵەکەیدا هەیبوو، پڕۆژەیەکی ئابووریی سەرکەوتووی بونیاد نا. قارچکەکانی نزار بەهۆی کوالێتیی بەرز و جۆرەکەیەوە، خواستی زۆریان لەسەرە و توانیویەتی سنوورەکانی ناحیەکەی ببڕێت.