وەرزی پەیدابوونەوەی گیا بەهارییەکان لە هەرێمی کوردستان دەستپێدەکات و چاوەڕوان دەکرێت نرخ هەرزان بێت

ئاڤا نیوز

هەرێمی کوردستان لە هەفتەی داهاتووەوە پێشوازی لە یەکەم کاروانی گیا و بەرهەمە بەهارییەکان دەکات و بەهۆی بارانبارینی زۆرەوە، پێشبینی دەکرێت نرخەکانیان بەراورد بە ساڵانی ڕابردوو هەرزانتر بن.

وێنە گەورەکە: وەرزی بەهار لە کوردستان تەنیا گۆڕانی کەشوهەوا نییە، بەڵکو هەزاران خێزان بەهۆی پەیدابوونەوەی گیا بەهارییەکان بژێوی لێ دابین دەکەن. ئەمساڵ بەهۆی بارانی زۆرەوە سرووشت زووتر "سەوز بووە" و زەوی بڕێکی زۆر لە گیا کێوییەکانی گرتووە؛ ئەمەش وادەکات بڕێکی زۆر لە بەرهەمەکان لە کاتێکی زوودا بگەنە بازاڕ.

لێدوانی فەرمی: ڕەجەب عەزیز، سەرۆکی ئەنجوومەنی عەلوەی هەولێر بە ئاڤا نیوزی ڕاگەیاند: هەفتەی داهاتوو گیا بەهارییەکان وەک کەنگر، تۆڵەكە و کاردوو دەهێنرێنە بازاڕ. دۆمەڵانی باشووری عێراق لە سەرەتای مانگی 3 و دۆمەڵانی قەراج و شارەکانی دیکەش 10 ڕۆژ دوای ئەوە پێدەگەن.

زانیاریی زیاتر: لە ئێستادا تەنیا کاردووی سووری و تورکی لە بازاڕەکاندایە، بەڵام لە هەفتەی داهاتووەوە بەرهەمە خۆماڵییەکان دەردەکەون و نرخەکانیان ئێستا بەمشێوەیە؛-

دۆمەڵانی قەراج: 100,000 دینار بۆ هەر کیلۆیەک.

کەنگری خۆماڵی: 5,000 تا 6,000 دینار بۆ هەر کیلۆیەک.

کاردووی خۆماڵی: 7,000 تا 8,000 دینار بۆ هەر کیلۆیەک.

کاردووی سووری و تورکی: 1,000 دینار بۆ هەر کیلۆیەک.

بەراوردکردنی نرخەکان لەگەڵ تێکڕای ساڵی ڕابردوو:

چوالە: 2,000 دینار.

گەڵامێو: 1,500 تا 2,000 دینار.

کاردووی خۆماڵی: 5,000 دینار.

کەنگری خۆماڵی: 4,000 دینار.

ڕێواس: 3,000 دینار.

دۆمەڵانی ئێرانی: 20,000 تا 30,000 دینار.

قارچکی کێوی (دیانا): 6,000 تا 10,000 دینار.