تەیف سامی: دوای تەواوکردنی رێکارەکان سبەی یان دووسبەی مووچەی مانگی یەک دەنێرم

ئاڤا نیوز

بەرپرسێکی باڵای کورد لە بەغدا لەسەر زاری تەیف سامی بۆ ئاڤا پشڕاستیکردەوە، دوای تەواوکردنی ڕێکارەکان، ڕۆژی دووشەممە یان سێشەممە پارەی مووچەی مانگی یەک خەرج دەکرێت.

چیرۆکی سەرەکی: ڕۆژی پێنجشەممە، وەزارەتی دارایی کوردستان وەک یەکێک لە پابەندییەکانی خەرجکردنی مووچە، بڕی 120 ملیار دیناری بە کاش خستە سەر هەژماری وەزارەتی دارایی عێراق لەڕێگەی لقی هەولێری بانکی ناوەندی.

لێدوانی فەرمی: بەرپرسێکی باڵای کورد لە بەغدا ئەم ئێوارەیە قسەی لەگەڵ تەیف سامی، وەزیری دارایی عێراق کردووە، لەبارەی مووچەی مانگی یەک و کاتی ناردنی، تەیف سامی وتوویەتی: ڕێککارەکان تەواو بن سبەی دووشەممە یان دووسبەی سێشەممە دەینێرم.

لەبارەی دابەشکردنی مووچە، هەر کە پارەکە گەیشت خشتەی دابەشکردنی مووچە بڵاودەکرێتەوە، لەوبارەیەوە وەزارەتی دارایی کوردستان دەڵێت، ڕۆژی دواتر دەست بە دابەشکردنی دەکەین و لە ماوەی سێ ڕۆژ تەواوی مووچە دابەش دەکەین.

تیمی 'هەژماری من' ـیش بە ئاڤایان وت: ئێمەش تەنیا سێ ڕۆژمان پێویستە بۆ دابەشکردنی مووچە، ئەم مانگە نزیکەی 700 هەزار مووچەخۆر بە دیجیتاڵی مووچە وەردەگرن.

لەلایەکی دیکەوە: هونەر جەمال، وتەبێژی وەزارەتی دارایی و ئابووری وتی: لە مانگی نۆی ساڵی 2025 هەناردەکردنی نەوتی هەرێمی کوردستان دەستی پێکردووە، مانگانەش بەشێوەیەكی بەردەوام بڕی 120 ملیار دیناری وەک داهاتی ناوخۆ ڕەوانەی بەغدا دەكەین، بۆیە زۆرینەی بیانووەکانی عێراقمان نەهێشتووە، تەنانەت لە ڕێی داهاتی ناوخۆ و هەناردەكردنی نەوتەوە، ئێمە 60% تاوەكو 70%ـی پارەی مووچە، خۆمان دابینی دەکەین.