وەزارەتی دارایی کوردستان 120 ملیار دیناری نارد بۆ بەغدا

ئاڤا نیوز

وەزارەتی دارایی و ئابووریی کوردستان، داهاتی نانەوتی خستە سەر هەژماری وەزارەتی دارایی عێراق لە لقی بانکی ناوەندی لە هەولێر.

چیرۆکی سەرەکی: وەزارەتی دارایی و ئابووری هەرێمی کوردستان، 72 ملیاری هەولێر و دهۆک لەگەڵ 48 ملیاری سلێمانی و هەڵەبجە مانگانە کۆدەکاتەوە، وەک داهاتی نانەوتی دەیخاتە سەر هەژماری بانکی وەزارەتی دارایی عێراق، لە لقی هەولێری بانکی ناوەندی، ئەمەش یەکێکە لە مەرجەکانی ناردنی مووچە لەلایەن بەغداوە.

زانیاریی بەدەستهاتوو: سەرچاوەیەکی ئاگادار لە وەزارەتی دارایی و ئابووریی حکومەتی هەرێمی کوردستان بە ئاڤا میدیای ڕاگەیاند: ئەمڕۆ پێنجشەممە بۆ مووچەی مانگی یەک، وەزارەتی دارایی و ئابووری بڕی 120 ملیار داهاتی ناوخۆی خستە سەر هەژماری وەزارەتی دارایی عێراق، لە لقی بانکی ناوەندی عێراق لە هەولێر.

ئەوەی پێشبینی دەکرێت: دوای ناردنی داهاتی 120 ملیار دینارەکە لەلایەن وەزارەتی داراییەوە، چاوەڕوان دەکرێت وەزارەتی دارایی عێراق لە زووترین کاتدا مووچەی مانگی یەکی مووچەخۆرانی کوردستان خەرج بکات.

باکگراوند: ناردنی داهاتی ناوخۆ بۆ بەغدا دوای ئەوە دێت ئەمڕۆ پێنجشەممە 48 ملیار دینار لە داهاتی نانەوتی سلێمانی و هەڵەبجە گوازرایەوە سەر هەژماری بانکی منارە لە هەولێر. پێشتر 72 ملیاری داهاتی نانەوتی پارێزگاکانی هەولێر و دهۆک ئامادەبوو، بە ناردنی 48 ملیارەکەی سلێمانی و هەڵەبجەش 120 ملیاری داهاتی نانەوتی داواکراو تەواو کرا و ڕەوانەی بەغدا کرا.