جارێکی دیکە نرخی زێڕ بەرز دەبێتەوە

ئاڤا نیوز

نرخی زێڕ لە بازاڕەکانی جیهان و کوردستان ڕووی لە بەرزبوونەوە کردووە، پسپۆڕێکی ئابووری دەڵێت: ئەمڕۆ چەندین داتای جۆراو جۆر لە ئەمریکا و وڵاتانی ئەورووپا بڵاودەکرێنەوە، ئەمەش کاریگەری لەسەر بەرزبوونەوەی نرخی زێڕ دروست کردووە.

وێنە گەورەکە: ئەمڕۆ، بۆ جارێکی دیکە نرخی زێڕ بەرزبوویەوە. دوای ئەوەی لە چەند ڕۆژی ڕابردوودا نرخەکەی دابەزیبوو، بەراورد بە 24 کاتژمێری ڕابردوو، نرخی زێر لە بەرزبوونەوەدایە.

لێدوانی فەرمی: سەفین وەرتی، ئەندامی سەندیکای زێڕنگرانی هەولێر بە ئاڤا میدیای ڕاگەیاند: لەگەڵ کرانەوەی بازاڕدا ئۆنسەیەک زێڕ 124 دۆلار و مسقاڵێک زێڕیش 25 هەزار دینار لە نرخیان بەرزبووەتەوە.

لەلایەکی دیکەوە: سەبارەت بە هۆکارەکانی بەرزبوونەوەی نرخی زێڕ لە بازاڕەکاندا، د.مستەفا مەلا حەسەن، پسپۆڕی ئابووری و پێشکەشکاری زەنگی بازار لە ئاڤا دەڵێت: "ئەمرۆ داتاکانی بێکاری و سێکتەری کشتوکاڵ لە ئەمریکا بڵاودەکرێنەوە، لە ئەورووپا داتاکانی هەڵاوسان کاریگەریان لەسەر بازار دروست کردووە."

د. مستەفا دەشڵێت: ڕۆژانی پێنجشەممە و هەینی لە ئەمریکا و بەریتانیا و ناوچەی یۆرۆ و کەنەدا داتای گرنگی ئابووری بڵاودەکرێنەوە. داتاکانی توانای کرین لەلایەن بەڕێوەبەرەکانەوە لە ئەمریکا بڵاودەکرێتەوە و ئەم داتایانە لەپاڵ گۆڕانکارییە جیۆسیاسیەکانی دیکە کاریگەری لەسەر بازار دروست دەکەن.

زانیاریی زیاتر: نرخی زێڕ لە بازاڕەکانی کوردستان و جیهان بەم شێوەیە:

٠ ئۆنسەیەک زێڕ بە پێنج هەزار و 65 دۆلارە.

٠ مسقاڵێک زێڕ عەیار 22 بە ملیۆنێک و 163 هەزار دینارە.

٠ مسقاڵێک زێڕ عەیار 21 بە ملیۆنێک و 110 هەزار دینارە.

٠ مسقاڵێک زێڕعەیار 18 بە 952 هەزار دینارە.