وەزیری تەندروستی: لە ماوەی ساڵێکدا زیاتر لە 10 هەزار حاڵەتی نوێی شێرپەنجە تۆمارکراون

ئاڤا نیوز

وەزیری تەندروستی داتای ساڵی ڕابردووی شێرپەنجەی ڕاگەیاند و ئاماژە بەوە دەدات، زیاتر لە 10 هەزار حاڵەت تۆمارکراوە کە 35٪ لە نیشتەجێی دەرەوەی هەرێمی کوردستانن و بۆ چارەسەر سەردانی نەخۆشخانەکانی هەرێمی کوردستان کردووە.

چیرۆکی سەرەکی: بەگوێرەی ستانداردی جیهانی لە کۆی 100 هەزار کەس 190 کەس تووشی شێرپەنجە دەبن، بەگوێرەی داتاکانی وەزارەتی تەندروستی لەماوەی ساڵانی ڕابردوو ڕێژەکە زۆر کەمتر بووە و لە هەر 100 هەزار کەسێک 141 بۆ 151 کەس تووشی شێرپەنجە بوون.

لێدوانی فەرمی: د. سامان بەرزنجی، وەزیری تەندروستی حکومەتی هەرێمی کوردستان لە کۆنگرەیەکی ڕۆژنامەوانیدا گوتی، "ساڵی ڕابردوو 10 هەزار و 481 حاڵەتی نوێی شێرپەنجە لە هەرێمی کوردستان تۆمارکراون، بەڵام ڕێژەی 35٪ـی هی دەرەوەی هەرێمی کوردستانن و لە سەنتەرەکانی شێرپەنجە چارەسەری پزیشکی وەردەگرن."

بە گوتەی وەزیری تەندروستی، "130 ملیار دینار بۆ دەرمان و پێداویستی پزیشکی بۆ شێرپەنجە خەرجکراوە لەماوەی ساڵی 2025، هاوکات 596 حاڵەت بە خۆڕایی و لەسەر سندووقی کۆمەک لە نەخۆشخانە ئەهلییەکان چارەسەرییان بۆ کراوە."

زانیاریی زیاتر: وەزیری تەندروستی نایشارێتەوە کە بەرنامەی کاری کابینەی نۆیەم، لە کەمکردنەوەی دووکەڵی کارگە و پاڵاوگەکان و جێبەجێکردنی پڕۆژەی ڕووناکی کاریگەری ئەرێنی لەسەر کەمکردنەوەی کاریگەری گازە ژەهراوییەکان و ڕێژەی تووشبوون بە شێرپەنجە هەبووە، ڕۆژ دوای ڕۆژ حاڵەتی تووشبوون بە شێرپەنجە کەمتر دەبێت.