سێیەمین کاروانی تووشبووانی تالاسیمیا دوای چاندنی مووخی ئێسک گەڕانەوە هەرێمی کوردستان

ئاڤا نیوز 

 

سێیەمین کاروانی تووشبووانی تالاسیمیا کە لە 14 نەخۆش پێکهاتبوون، دوای ئەنجامدانی نەشتەرگەری چاندنی مووخی ئێسک و مانەوەیان بۆ ماوەی زیاتر لە 100 ڕۆژ لە دەرەوەی وڵات، گەڕانەوە هەرێمی کوردستان.

چیرۆکی سەرەکی: بە فەرمانی سەرۆکوەزیرانی کوردستان، بە پێنج کاروان تووشبووانی تالاسیمیا، دەنێردرێن بۆ دەرەوەی وڵات. چارەسەری پێویست و پێشکەوتوویان بۆ دەکرێت. ئێستا سێ کاروانی تووشبووانی تالاسیمیا لە دەرەوەی وڵات چارەسەر وەردەگرن.

 
لێدوان فەرمی: د. سامان بەرزنجی، وەزیری تەندروستیی حکومەتی هەرێمی کوردستان بە ئاڤای ڕاگەیاند: "سوپاسی ڕۆڵی مەسرور بارزانی سەرۆکوەزیران دەکەین، لە سەرخستنی پڕۆژە مرۆڤدۆستییەکانی کەرتی تەندروستی، بەهۆی پاڵپشتی سەرۆکوەزایران ئەم پڕۆژانە بەردەوامیان هەیە. توانرا هیوا بۆ سەدان خێزان بگەڕێنرێتەوە."

زانیاریی زیاتر: بەمەبەستی ئەنجامدانی نەشتەرگەریی چاندنی مووخی ئێسک، وەزارەتی تەندروستیی حکومەتی هەرێمی کوردستان 172 هاووڵاتی کە پێکهاتوون لە تووشبووانی تالاسیمیا، بەخشەران و هاوەڵەکانیان ڕەوانەی دەرەوەی وڵات کرد، ئەمەش دوای تەواوبوونی سەرجەم پشکنینە سەرەتاییەکان و ڕێکارە زانستییەکان لە ناوخۆی هەرێمی کوردستان؛ هاوکات تەواوی تێچووی ئەم پڕۆسەیە لەوانە؛ خەرجیی گەشتکردن، مانەوە، پشکنینە پزیشکییەکان و خودی نەشتەرگەرییەکە، بەتەواوی لەسەر ئەو بودجەیە کە حکومەت دابینی کردووە.

ئەمەش بزانە: بەگوێرەی ڕاگەیێنراوێکی وەزارەتی تەندروستی، ئامادەکاری دەکرێت بۆ ناردنی کاروانی شەشەم کە ژمارەیەک لە تووشبووان و هاوەڵەکانیان لەخۆدەگرێت، بۆ هەمان مەبەست ڕەوانەی دەروەی وڵات دەکرێن.