لە چین تۆزێکی نوێ داهێنراوە بە لەرەلەر ددان سپی دەکاتەوە و مینای ددان چاک دەکاتەوە

ئاڤا نیوز

لە توێژینەوەیەکدا زانایانی چین تۆزێکی سپیکەرەوەی ددانیان داهێناوە کە لە ڕێگەی لەرەلەری فڵچەی کارەباییەوە چالاک دەبێت، ئەم داهێنانە نەک تەنیا ددانەکان بە شێوەیەکی سەلامەت سپی دەکاتەوە، بەڵکو بەهۆی پێکهاتە تایبەتەکەیەوە مینای ددانەکان چاک دەکاتەوە و تەندروستیی ناو دەمیش دەپارێزێت.

ئەوەی پێویستە بیزانیت:  تۆزە نوێیەکە لە سیرامیکی تایبەت دروست کراوە و کاتێک فڵچە کارەباییەکە دەلەرێتەوە، کایەیەکی کارەبایی بچووک دروست دەکات کە دەبێتە هۆی کارلێکێکی کیمیایی بۆ لادانی ئەو پەڵانەی بەهۆی قاوە، تەماتە یان هۆکاری بۆماوەیی دروست دەبن. جیاواز لە سپیکەرەوە کیمیاییەکان، ئەم شێوازە زیان بە مینای ددان ناگەیەنێت، بەڵکو بەهۆی هەبوونی کانزای وەک کالسیۆم، بەشە زیانلێکەوتووەکانی مینا و ددان چاک دەکاتەوە.

تاقیکردنەوەکان دەریانخستووە دوای 12 کاتژمێر لە بەکارهێنانی، بۆ ئەو کەسانەی پەڵەی قاوە و چایان هەیە، بە ڕێژەی 50% سوودی زیاتر بووە وەک لە ششتنی ددان بە ئاو و خوێ.

لێدوانی فەرمی: مین شینگ، یەکێک لە ئەندامانی توێژینەوەکە ڕایگەیاند: "ئەم تۆزە جێگرەوەیەکی سەلامەتە کە هەر لە ماڵەوە ددان سپی دەکاتەوە، مینای ددان چاک دەکاتەوە و تەندروستیی ناو دەم دەپارێزێت."

زانیاریی زیاتر: توێژینەوەکە لە گۆڤاری زانستیی 'ACS Nano' بڵاوکراوەتەوە و لەسەر مشکیش تاقی کراوەتەوە؛ دەرکەوتووە دوای چوار هەفتە لە بەکارهێنان، تۆزەکە بەکتریا زیانبەخشەکانی ناو دەمی کوشتووە و یارمەتیی گەڕانەوەی بەکتریا سوودبەخشەکانی داوە.