دوای دوو ساڵ لە جەنگ تۆپی پێ دەگەڕێتەوە نێو کەرتی غەززە

ئاڤا نیوز

ماوەی زیاتر لە دوو ساڵە بەهۆی جەنگی نێوان ئیسرائیل و حەماس، هیچ پاڵەوانێتییەکی تۆپی پێ لە غەززە ئەنجامنەدراوە و کەرتی وەرزشی ئەو ناوچەیە بە تەواوی پەکخراوە، بەڵام هەوڵەکان بۆ دەستپێکردنەوەی وەرزش لەو کەرتە دەستیپێکردووە و بڕیار لەسەر ڕێکخستی پاڵەوانێتییەکی تۆپی پێ دراوە.

چیرۆکی سەرەکی: هێرشەکانی دوو ساڵی ڕابردووی ئیسرائیل ئەگەرچی غەززەی کردووەتە وێرانە، بەڵام، هەنگاونان بۆ دەستپێکردنەوەی ژیانێکی نوێ بەردەوامە، بەرپرسانی وەرزشی فەڵەستین لە ڕێگای هەماهەنگی و چالاکی خێرخوازی هەوڵدەدەن بە بەڕێوەچوونی پاڵەوانیەتییەکی تۆپی پێ، پەیامی ژیان بەردەوامە بۆ جیهان بنێرن.

لێدوانی فەرمی: شەریف نەیرەب، گوتەبێژی ڕێکخراوی خێرخوازی ئیماڕاتی و کەسایەتییەکی سیاسی فەڵەستینی، قسەی بۆ میدیا عەرەبییەکان کردووە و دەڵێت: "ئەم پاڵەوانێتییە بۆ ئەوەیە جارێکی دیکە زەردەخەنە بخەینە سەر لێوی دانیشتووانی غەززە، هیوادارین لە مانگی ڕەمەزاندا خێر و بەرەکەت ڕوو لە ناوچەکە بکات و لەو کاتەشدا پاڵەوانیەتییەکە بەڕێوەدەچێت." 

لەلایەکی دیکەوە: کەریم زەکی عەتار، سەرۆکی یانەی وەرزشیی ڕەفەح، ڕایگەیاند: وەستانی یارییە وەرزشییەکان زیانێکی زۆری بە وەرزشوانان گەیاندووە، ئاماژەی بەوەدا، کە هەوڵ دەدەن لەمەودوا جارێکی دیکە تۆپی پێ و وەرزشەکانی دیکە لە ناوچەکە زیندوو بکەنەوە. 

زانیاریی زیاتر: یەکێتیی تۆپی پێی نێوخۆیی فەڵەستین، بە هەماهەنگی لەگەڵ خێرخوازانی ئیماڕاتی، بڕیاریان داوە بۆ مانگی ڕەمەزان، پاڵەوانێتییەکی نێوخۆیی بۆ تیمە میللییەکانی غەززە و بەشێک لە تیمە میللییەکانی فەڵەستین بە ناوی ''پاڵەوانێتی ڕەمەزانی غەززە'' بکەنەوە و هاوکات تیروپشکی ئەو پاڵەوانەتییە ئەنجامدراوە.

ئەمەش بزانە: لە دوای وەستانی شەڕ و ئاڵۆزییەکانی نێوان حەماس و ئیسرائیل، هەڵبژاردەی فەلەستین بە نوێنەرایەتی وەرزشوانانی ئەوە وڵاتە، چەندین یاریی خێرخوازیی لە وڵاتانی ئەوروپا ئەنجامداوە، لە دواین دوو یارییشدا لە هەرێمی باسک و کەتەلۆنیای ئیسپانیا دوو یاریی کرد و داهاتی یارییەکەش بۆ لێقەوماوان و وەرزشوانی غەززە دابینکرا.